Mynta ka sngi ka East Jaintia National Council hapoh ka jingialam u President Rangbah ka seng u bah Sambormi Lyngdoh ka la ai da ka dorkhas ha u DC ka East Jaintia Shri. A. Baranwal (IAS) ha kaba iadei bad ki post kiba pher ba pher hapoh ka District Selection Committee ka EJHD.
Haka jingthoh ka seng ka pynpaw ba ha kine ki por bala dep, duna palat kiba ioh rung haka DSC ka East Jaintia na ki nongshong shnong kane ka thaiñ. Kumta ka seng ka pynpaw hakhmat u DC ba kat kum ka Reservation of Vacancies in services/posts under the state Government hapoh ka Office Memorandum No.PER.272/72/5.dated 18th Dec.1972 ha ka para 2.2 ka iathuh shai ba ia ki post ki bym dei transfer ki dei ban leit beit sha ki trai District (Local residents) haka jingjied ia ki Candidate. La iathuh shai ba ka jingjied ia ki candidate kan long beit thik tang ia ki trai District.
Haka jingiakren bad u DC na ka liang u President bah Sambormi Lymgdoh u la pynpaw ruh ba ka seng hi kala shimkhia naka bynta ka bha ka miat khamtam ki samla wad kam u la ban jur ba iaki post hi ba hap hapoh ka DSC ka dei hok ban ioh da ki trai District namar bun ki samla ka District mynta kidei kiba lah pyndep iaki jingpule kiba lah biang eh bad ki DSC, bad kane kan sa ai mynsiem ruh ia kito kiba dang pule.
Ka seng ka pynpaw ruh ba kam shym lah object ia kiwei ki candidates naki wei ki thaiñ lada ym don candidate na ka thaiñ. Hynrei katba dang don ki candidate na ka thaiñ hi ka policy ka dei ban iaid katkum ba la bthah da ka Department jong ka Personnel & Administration Reform ba haba don ki candidate kiba lah biang (deserve) dei ban ai shwa na ka thaiñ hi.
Naka liang u DC ruh u la sngewiahap bha bad kane bad u la kular ruh ban ai ktien sha ki bor ba halor ban pyntreikam pura iakane ka jingdawa ka seng. Bad ka seng ruh kan sa buddien iakane.
Khatduh ruh naka bynta ki nong shong shnong ka East Jaintia hi khamtam kito ki samla wad kam ba kim dei ban duh jingkyrmen bad ha mar ba ia advertise iaki post khamtam ka DSC ba ki dei ban apply bad trei shitom ha ki jingpule, namar ka jingtrei minot hi ka wallam sha ka jingjop, pynkut u Sambormi Lyngdoh President Rangbah ka seng.