Mynta ka sngi ka KSU Jowai Unit ha poh ka jingialam u President Ewanmi Phawa bad Publicity Secretary Nidapoi Shadap ryngkat ki dkhot kila leit pynsangeh ia ki bar jylla ba wan trei beaiñ khlem don ki Labour License bad Work Permit ha kawei ka Petrol Pump thymmai ba dang pyntrei ha shnong Mihmyntdu, West Jaintia Hills District.
Ka KSU ka pynpaw ba kane ka jingiohlad jong kine ki bar jylla ban trei beaiñ hapoh katei ka shnong ka dei ka jingbah khlieh bad ka jingleh marwei jong u Waheh Shnong ka Mihmyntdu, ha kaba kiwei kiwei ki nongialam jong kane ka shnong kim don jingtip eiei halor kane ka jingwan trei jong kine ki bar jylla. Kumta na ka liang ka KSU kam ailad ba kine ki bar jylla kin trei ha katei ka Petrol Pump kat ba kim pat lah ban pynbiang ia ki kot ki sla ba donkam.
