Ka Society for Urban and Rural Empowerment (SURE) Jowai, ha ryngkat ka jingïatreilang bad ka ophis North East Slow Food Agrobiodiversity Society (NESFAS) Shillong mynta ka sngi Palei (6 tarik u Ïaïong) kala pynlong ïa ka ‘Cluster Sharing Workshop’ ha Madan Tympang Club, Iaw Musiang Jowai.
Ha kane ka workshop la wan ïashim bynta lang da ki nongrep bad ki sahep sorkar halor ka project kaba ong “Ban pynkup bor ïa ki riew lum kiba dei ki trai jaka trai muluk lyngba ka rynsan Agroecology Learning Circle ban ïoh ïa ka mei ramew kaba shong shngaiñ, kaba kynthup lang ïa baroh bad kaba ïarap ban wad ki lad thymmai na ka bynta ka bha ka miat, khnang ba ka lawei kan long pahuh pahai ha ka bam ka dih”.
Na ka liang ka kong D.V. Lyngdoh, MCS Additional Deputy Commissioner West Jaiñtia Hills haba ai jingkren kum ka kongsan kala ong “Dei ban phai sha ka rep tynrai ban ïoh ïa ka jingbam kaba khuid ba suba namar ki long ki dawai ïa ka koit ka khiah jong u briew”.
Kala ong kino kino ki SHG ne ALC ki long shisha kum kita ki sharak kiba rah jingshai sha ki shnong ki thaw kaba pynithuh ïa ka shnong jong ki shabar jong ka Jylla bad ka ri hi baroh kawei kum ba long u shynrai Lakadong.
Kala ong ba u Sohphlang u dei u jingbam uba bang bha ban bam da kaba pyndonkam ïa ka rukom rep ïa u da ki jingstad tynrai nalade hi kala long ka jingtip thymmai mynta ka sngi hadien ka jingïoh jingbatai na ki nongrep.
“Ha kine ki sngi ba mynta shibun na ki jait jingpang kiba ktah ïa u briew kiba ym lah shuh ban batai la ki wan na ka lyer, na ki jingbam ne da kiwei de” hynrei ka por kala dei ban kyndit bynriew noh ba ngi dei ban phai khmat noh sha ka kam rep tynrai kaba long ka jingmyntoi kaba khraw ha ka koit ka khiah, ong ka kong Lyngdoh.
Kala ong wat ha ki por jong ka khlam baroh baroh ki ia kynduh jingeh ban ioh jingbam khamkam ki jhur hynrei lyngba ka jingdon ki nongrep tynrai kila lah ban pyndap pynbiang ia ka jingdonkam ha ka bam ka dih da ki jhur kiba khuid ba suba.
Kum ki longkmie ban pynkiew ïa ka ïing ka sem ka kong Lyngdoh ka ong ngi dei ban pynneh pynsah ïa ka riam tynrai hakhmat jong ka pyrthei khnang ba kine ruh kin long kiba sah pateng la pateng na ka bynta ki khun ki ksiew lashai la shi sngi bad ba kim nym shah tuh ha kiwei pait ki jaitbynriew ba nabar.
Ha kaba ïadei bad ka bam tynrai kala kyntu ban pynneh pynsah da kaba ai nuksa mynta kiba bun hi ki khynnah rit ki kwah ban bam tang da ki jingbam ba lai phew jait kum ki Chow, Momo, Pisa bad kiwei bad kyntait ïa ki jingbam tynrai kiba la sdang ban klet noh. Ka ong dei ban pynim ia ka jingbam tynrai da ka jingïatrei lang naduh ki bor sorkar haduh ki nongrep.
Kala ai khublei kyrpang ïa ka SURE kaba la trei ïa kane ka bynta kaba khraw eh ban pynneh pynsah ïa kane ka bam ka dih tynrai lyngba ki nongrep, kumta ka kyntu ïa ki nongrep ba kin nang kiew shaphrang ha ka ban pynmih ïa ki mar rep tynrai bad kane kan pynkiew ruh ïa ka ïoh ka kot jong ka jylla da kaba ym donkam shuh ban shaniah ïa ki jingbam kiba wan nabar.
Ïa ka jingïalang la pynïaid da u ma Heimonmi Suchiang, Community Facilitator Thadmuthlong C, la ïoh ruh ka jingrwai na ka shnong Sohmynting, ka jingkren na u ma H.H. Mohrmen Secretary SURE, la batai bniah ia ka rukom pynmih ïa ki mar rep tynrai da ki nongrep kiba kynthup na Mukhap, Lumtrep, Mynso, Muphlang bad Sohmynting kiba la batai ia ka rukom thung ïa u Kubi, Sying, Shynrai, Sohphlang bad kiwei. Labatai kumjuh shaphang ka Community Seed Bank da ka Iaraplang PGS/ALC Mulum.
Kiwei de kiba iadonlang ha kane ka sngi ki long u bah S. Ranee, District Horticulture Officer, WJH kum u symbud kongsan, u Bah S. Lyngdoh na ka CLLMP nalor kiwei de ki ophisar sorkar, katba ïa ki kyntien ai khublei la ïoh na u ma Ribaitmiki Ryngkhlem, Community Facilitator, Madur.
Hadien kane ka prokram la don ka jingleit jngoh ha manla ki Stall ba wanrah ïa ki mar bapher bapher.
Kiwei de kiba ïadon ryngkat ha kane ka jingïalang ki kynthup ïa u ma D.Phyllei, Assistant Director Horticulture, kong D.Pasweth ADO Namdong circle, u bah G.Mylliem, BDO Amlarem Block, u ma L. Suchen, Skill Development officer nalor kiwei de.
