Ka seng East Jaiñtia National Council (EJNC) Central Executive Committee, hadien ba kala ioh shibun ki jingujor na ki paidbah nongshong shnong ka thaiñ ba bun ki trok na bar jong ka jylla kila wan ban theh ne pynpoi ïa u dewiong sha ki karkhana Dewbilat kiba don ha ka East Jaintia Hills District, ha kaba ka seng kala lap bad ioh bat ruh ia kawei ka trok kit dewiong kaba dei jong ka Star Cement ka bym shem la bud ia ka SOP bad ka bym don ia kiwei de ki kot ki sla kiba biang.
Kumta mynta ka sngi ka seng hapoh ka jingialam jong u President u ma Sambormi Lyngdoh ki la leit ban ai da ka jingthoh ha u Deputy Commissioner ka East Jaiñtia Hills District, ban dawa na u ban shim khia ia kane ka kam. Ha ka juh ka por ka seng kan leit buh ruh ia kane ka juh ka jingdawa sha u SP ka District bad sha kiwei de ki bor ba dei peit, na ka bynta ban pynsangeh bad shim khia ia kane ka jingwan jong ki trok kit dewiong na ki wei ki jylla shapoh ka jylla bad kumjuh ruh ban khang ia kito ki trok kit dewiong be-aiñ kiba napoh jylla Meghalaya ban leit sha kiwei pat ki jylla.
Na ka liang u ma Sambormi Lyngdoh u la ong ruh ba na ka liang u Deputy Commissioner u la kular ban shim khia ia kane ka kam, hynrei lada ka seng kam iohi ia kino kino ki kam kiba ia dei bad kane ka jingdawa na ka liang ka seng kan sa iaid da kawei pat ka lad ka lynti.