Ka Green Valley Industries Ltd. ka Company kaba pynmih ïa ka dewbilat Max Cement kaba don ha shnong Nongsning, East Jaiñtia Hills mynta ka sngi kala pynlong ïa ka prokram synñiang.
Ha kane ka jingsynñiang snam la wan ban ïasynñiang da ki nongtrei ka Company bad ki nongshong shnong na katei ka thaiñ kiba don baroh 47 ngut.
Ki bor pynïaid jong katei ka Company ki ong ba kane ka dei ka sien ba nyngkong ïa ki ban ïashim bynta bad ha ka juh ka por kan long ruh kum ka lad ban kyntu lang ïa kiwei ban ïasynñiang lem ïa ka snam na ka bynta ban ïada ïa ka jingim briew bad ka dei ruh ka sngi kynmaw burom ïa u (L) Gajanand Agarwal u nongseng ïa ka Compani jong ki.
U Pawaan Kumar Asst. Vice President Commercial Department haba ai jingkren ula ong kumba long mynta ki jingai snam ka long kaba donkam eh bad ka long ka lad ban ïarap kylliang da ka mynsiem ïa kito kiba kynduh jingeh bad donkam kyrkieh ïa ka snam.
Shuh shuh ula ong ba ka kam synñiang ka don ha kiba bun ki rukom la ka dei lyngba ki marbam bad kiwei de, hynrei ka jingsynñiang snam ka dei kawei na ki bynta ba kongsan kaba ïarap ïa ki mynsiem briew hapoh ka imlang ka sahlang.
Hashwa ban pynlong ïa ka jingsynñiang snam la ïoh ka jingduwai na u Waheh Shnong Nongsning ma Lambha Dhar bad ka jingkren na ki katto katne ngut na ki nongtrei katei ka Company. Katba na ka liang ka Company bad kumjuh na ka Jowai Civil Hospital Blood Bank kila ai da ka syrnod sha baroh kitei ki nongsynñiang snam ei.
