Ki nongialam jong ka Jaiñtia Fishing and Environmental and Protection Association (JFEPA), kawei ka Association ha rilum Jaiñtia kaba pynneh pynsah ia ki dohum dohwah na ka jingpyniap pathar ia ki, mynta ka sngi ha ka jingkren sha ki lad pathai khubor ka la buh ki jingmana bapher bapher ha ka jingiadei bad ka jingiada ia ki doh um doh wah kiba don ha shi lynter ka wah Myntdu.
U President ka Association u ma D.H. Pde, u la ong ba ka seng ka khang pyrshah ia kino kino ki briew ki ba tong Sasi ha ka wah Myntdu khamtam ha kine ki por Lyiur ba ka um kala heh, shuh shuh la khang pyshah ruh ia ki nongsait jaiñ ha ki jaka bapher bapher jong ka wah kiba don ki dam, namar bun sien ka um sabon kaba mih na ka jingsiat jaiñ ka long ka bih bah ia ki dokha dohpnat.
Ha ka jingiadei bad ka kuna kaba la buh 10 hajar mynshwa ia kito kiba khwai tuh ha ka Wah Syntu ksiar ka thew bala pynlong Sanctuary Park, la pynkiew mynta shaduh ka 50 hajar tyngka bad ka seng hi kan ym map ia kino kino kiba pynkheiñ ia kane ka kyndon.
Na ka liang ka JFEPA, nalor ka jingkyntu ia ki nongshong shnong ka sor Jowai ha kaba leh khuid ia ka wah Myntdu, ka la kyntu ruh ia kiwei de ki shnong ba don ha ki rud jong kane ka wah, kum ka shnong Mustem, Iongnoh, Muphlang bad kiwei ba kin don ka jingiatrei lang na ka bynta ban pynneh pynsah ia ka jingkhuid ka wah Myntdu, namar baroh ki briew ba shong ha sor Jowai bad ki shnong ba mar jan ki ioh umdih umbam lyngba jong ka wah Myntdu.
Ka Association kala khang pyrshah ruh ia kino kino ki briew kiba khlong maw na poh bad na rud jong ka wah. Ka JFEPA ka kyntu jur ruh ia ki bor District ban peit bniah ia ki jingshah ktah jong ka wah khnang ba kane ka wah kan sah haka jingkhuid jingsuba bad kaba don ki dohkha dohpnat.
Ha kane la sngi la donlang ruh u Vice President ma David Blah, General Secretary ma M. Challam bad kiwei de.