U Myntri Khynnah ka sorkarkmie ba dei peit ïa ka tnad Pla tyngka (Finance) u Pankaj Chaudhary, ha ryngkat ka jingsynran lang jong u Personal Secretary u Kumar Ravikant Singh (IAS) bad u Dhruv Narayan Shrivastav (First PS) jong u, hynnin ka sngi saitjaiñ 15 tarik ula wan hiar sha Jowai, West Jaiñtia Hills.
“Kane ka jingwan u Myntri ka long shi bynta ban jurip ïa ka rukom pyntrei kam ïa ki skim bala bei pisa da ka sorkar kmie shapoh ka District lyngba ki tnad sorkar bapher bapher”.
Ha kane ka sngi la ïadonlang da u Commissioner & Secretary jong ka sorkar jylla u Dr Joram Beda (IAS), u Deputy Commissioner, West Jaiñtia Hills District bah B. S Sohliya (IAS) ha ryngkat ki ophisar ka District kiba la pdiang sngewbha ïa utei u Myntri ka sorkar kmie.
Ha ka jingjuripbniah ïa ki skim jong ka sorkar kmie hapoh ka jingïalang ba la pynïaid da u Myntri la ïatai bad phylliew jingmut shaphang kitei ki skim ba la mang kyrpang sha ka District da kaba kyntu ba dei ban pyntrei dep ïa ki khnang ba kin long kiba jop.
Hadien kane u Myntri ula leit jurip ïa ka jaka Anganwadi Centre kaba don ha Moopyllaitsyiar, ha kaba ula ïoh lad ban ïakren ïa ka District Programme Officer, Child Development Project Officer bad ki nongtrei jong ka Anganwadi.
Nangta u Pankaj Chaudhary ula leit hiar sha kawei ka jaka jongkai ka ‘Krangsuri’ ha kaba la don ruh ka jingpdiang burom ïa u da ki jingrwai tynrai bad ula ïoh ban ïakren ruh bad ki nongïalam shnong ka Ladjaplem.
Ha kane ka jingïaid lynti ula ïoh lad ban peit kai shipor ïa ki Pukni ha Lad Demthring kiba la don da ki kynhun ha katei ka jaka. La synran lang ïa u Myntri sha Krangsuri da ka kurim jong u ka Bhagya Shree Chaudhary.
