Ka jingialang jong ki trai trok kiba kynthup ia ka All Jaiñtia Cement & Clinker Transporter’s Association (AJCCTA), ka Jaintia Hills Truck Owner Association (JHTOA), bad ka Meghalaya Truckers Union (MTU), ki ba don hapoh ka lama jong ka JAC, kila pynlong ia ka jingialang hynne ka sngi ha 7-Mer hajan jong ka Ialong Toll Gate, West Jaiñtia Hills District, ban pynbeit ia ki jingeh jong ki trai trok hynrei kala shu kut noh khlem da lah ban rai ei ei na ka daw ba u President bad Seceretary jong ka JAC kim shym la wan sha kane ka jingialang.
Na liang u ma J. Phawa Conveneer jong ki trai trok u la ong ba ha kane jingialang, kum ki trai trok ym lah ban shim ia kano kano ka rai kumta yn hap ban khot ia ka jingialang ha kane ka 15 tarik ha kane ka hi kaja, bad u la kyntu ruh ia ki President bad Secretary ka JAC ban iadonlang ha katei ka sngi khnang ban lah ban pynbiet ia ki jingeh kiba ki trai trok ki iakynduh.
U President ka MTU u bah Monte Ranglong u la ong mynta ka sngi ka MTU ka don jingmut ban mih noh na ka JAC, hynrei na ka daw ka jingkyrpat ki para trai trok namar ka jingbymwan ki nongkit kam jong ka JAC, ki la sangeh shwa ia kane ka rai, namar kiba bun hi ki kwah ban shim ia ka rai ha ka General meeting ka ban sa long ha kane ka 15 tarik mynta u bnai. Hynrei ula ong ba lada lah ban the ia ka jingiadei jingmut kin bteng biang ka jingiatreilang bad lada ym long kumta kin sa mih noh na ka JAC.
Na ka liang u ma Balen Thubru President ka AJCCTA, ma u ruh ula pynpaw ia ka juh bad ka kynhun jong u kala kwah ban mih noh na ka JAC hynrei ki ruh kin dang ap ia ka rai jong ka General Meeting. Na laing u ma Thubru u la ong kyntu ruh ia u President ka JAC ban khot jingialang hapoh ka 15 tarik na ka bynta ban pynbiet noh ia kane ka kam.
Ha kane ka jingialang mynta ka sngi la rai ban khot biang da ka jingialang paidbah ha kane ka 15 tarik Risaw, ka ban pynlong ha 7-Mer hajan ka Toll Plaza Ialong.