Ia ka Music Video “Ka Khon Khatdõh” kaba dei jong i kong Lambhadaka Patlong la wan ban pyllait paidbah da u President ka Khasi Student Union (KSU) Sengkmie u bah Lambokstar Marngar ha kane ka sngi saitjain ha ka 9 tarik mynta u bnai ha ka jingialang kaba la pynlong ha Conference Hall ka GHM, Caroline Jowai .
Ha ba kren kum u kongsan u bah Lambokstar Marngar, u la ong ba bun sien hi kino kino ki sur jingrwai ki don ki jingsneng jingkyntu kiba khraw na sha lyndet, kumta haba phai sha kawei pat ka bynta ia ka jingiadei bad ka jingpynwan dur ia kane ka sur jingrwai “Ka Khon Khatdõh” ka don ka jingiadei bad ka jinglong jingman jong ka jait bynriew ha kine ki sngi.
U la ong ruh ngi im ha kine ki sngi ba bun kam bun jam, ka jingiabeh ban kiew hala ki jong ki jong ki kam ne ha ki liang bapher bapher bad la jan man la kawei pa kawei ka longiing ym don kiba lait khlem da pynlut por ha ka pule puthi, hynrei pat lada peit ha ka akor burom pat bad ka riti dustur la iohi kumba ka nanghiar.
Shuh shuh ha ka jingiadei bad ka kam thoh kam tar u la ong kam dei kaba suk, namar ba hap ban ngam jylliew bha ha ka jingiadei bad kano kano ka jingmut jong ka jingthoh ne ka sur jingrwai. Na ka liang u bah Marngar u la kit bok kit rwiang ruh ia ka kong Lambhadaka ba kan nanglah shuh shuh ban pynmih ia ki sur jingrwai kiba lah ban ai jingmyntoi ia ki padibah.
Ka kong Lambhadaka ka ong ba kane ka sur jingrwai “Ka Khon Khatdoh” dei ka jingwan ha ka jingmut jingpyrkhat jong ka kum ka nongthoh haduh lai sngi ban ban, haduh ba ka hap ban pyrkhat ba kane ka long ka jingkhot ia ka ban thoh ia kane ka sur jingrwai, kumta ha ka sngi basaw ka la sdang ban thaw bad thoh ia kane ka sur jingrwai “Ka Khon Khatdoh”. Ka la ong ruh ba ia kane ka kam thoh kam tar kam juh poi pyrkhat ne phohsniew mynno mynno ruh, hynrei ryngkat ka jingiarap ki paralok ha ki ba bun ki liang la lah ban pyndep nadong shadong ia kane ka sur jingrwai tang hapoh 3 bnai, haduh ban da poi kane ka sngi sah kynmaw.
Ha kane ka sngi la donlang u ma u Riquoma Laloo, Waheh Shnong Panaliar, kong W. Sumer, ma H. Pajuh ma K. Ladia, Waheh shnong Khliehiongriang ma H. Sutnga, ma E. Shylla Waheh Shnong Iawmusiang bad kiwei kiba la shah khot sngewbha.
