Ka All Jaiñtia Mid Day Meal Workers Union (Sengkmie) ha ka jingialam u Samla Jerry A Suting, President ha ka jingsynran lang ka Kong Jena Nengnong, President Cook cum Helper na East Khasi District, Samla Charles Shongwan, General secretary na Ri Bhoi District lem bad kiwei ki nongïalam ka seng, ha ka 26/04/2023 ki la ïa kynduh ïa u Rakkam A Marak Myntri ba dei peit ïa ka tnat pule ka sorkar jylla ha ka jingdonlang ryngkat u MLA Rambrai.
Ha kane ka jingiakynduh ka seng na ka bynta ki hajar ngut ki nongshetja ha ki skul bapher bapher hapoh ka jylla ka la pypaw ïa ka jingsngewnguh ïa ka sorkar Jylla halor ka jingpynkiew ïa ka pisa ne ka jingaisngewbha (honorarium) kaba ju ai ₹100 shibnai naduh 20 snem tam mynshwa bad mynta u snem kala pynkiew sha ka ₹1100 shibnai na ka bhah ka sorkar Jylla bad kaba dei ban treikam naduh u bnai April ’22. Kumta ka jingsiew ïa ki nongshetja ka la long ₹2000 shi bnai na ka bynta tang shiphew bnai (₹900 na ka bhah ka sorkar kmie bad ₹1100 shi bnai na ka sorkar jylla).
Ha kajuh ka por ka Seng ka pynpaw ka jingsngewnguh ruh halor ka jingpynpoi ïa ka jingaisngewbha man u bnai lyngba ki bank account jong palat khadphra hajar ngut ki Cook cum Helper PM POSHAN ha jylla bad ka kyrpad ruh ïa ka sorkar ban pyllait kloi ïa ka pisa kaba ka la kular ban siew naduh u bnai April ’22.
Ka seng kaba la ïalam khmat ban ïakhih ha ka jylla haduh ba ka sorkar jylla ka la pdiang ban pynkiew ïa ka pisa jingaisngewbha sha baroh ki Cook cum Helper, ka la ban jur ïa u Myntri ban ai noh da ki tyndong lyer shet (LPG), ka Um sorkar ban ïoh ban shet ha ki kamra shetja ha ki skul, khnang ba ki nongshetja kin ïoh ïa ka met kaba koit bakhlaiñ bad khamtam ban iada ia ka Meirymew.
Nalor katei, ka seng kala kyrpad jur ruh ïa u Myntri ban ïa kren lem bad ka Sorkar India ba kan ïarap ban pynkiew noh ïa ka jingaisngewbha na ka bhah jong ka sorkar kmie sha baroh ki nongshetja skul ha ka Thaiñ shatei lammihngi khamtam ïa ka jylla Meghalaya kaba la mad ïa ka jingremdor jong ki mar bam ha iew ha hat bad khamtam ha ka pule ka dangle jong ki khun ki kti. Ka shuti ïa ki nongshetja haba ki pang ki shitom khamtam ïa ki Longkmie.