Ka jingiohlad jong ki khlaw ki btap bad ki jyrmi ban snoh ha ki ba bun tylli ki Tower ba kit bording jong ka Company Power Grid Corporation of India Ltd kiba don ha ki bynta jong ka shnong Ratacherra ka lah buh ha ka jingma bad jingmynsaw ia ki nongshong shnong ha Ratacherra bad ruh ha ka thaiñ hi baroh kawei ba dei iaid kine ki lain kit bording ba khlaiñ bor.
Ha ka jingiakren bad u wei na ki riew rangbah jong ka shnong Ratacherra u ma G. Dhar ula iathuh ba kane ka jingiohlad jong ki sañium ban snoh ha kitei ki Tower ba kit ia ka bor ding kaba khlaiñ bor ka dei na ka jingkheiñ sting jong ka Company ban pynkhuid na ka por sha ka por. Kumta kane ka long ka jingma kaba khraw ia ki nongshong shnong lada jia ba ka bor ding kan pur lyngba kitei ki jyrmih sha khyndew. Ula ong ba kine ki jaka ba iaid kine ki Tower ki don ki jaka rep jaka riang jong ki nongshong shnong bad don ruh kiba iaid lyngba ka shnong bad ki kper briew, te lada ka Power Grid kam pynkhuid noh ia kitei ki sañium ba la snoh ha kitei ki Tower bad ki tyllai bording ym lah ban tip ba shisien ka sngi kan sa wan rah ka jingmynsaw ia ki nongshong shnong.
Kaba kham shyrkhei shuh shuh ka long ba ki don napdeng kine ki Tower kiba iaid lyngba na jan jong kawei ka ïing skul jong ka Wellington Jungai Memorial Secondary School, Ratacherra. Kane jingleh lyndet jong ka Power Grid kala buh jingma mynta wat ia ki khynnah pule jong kane ka skul ruh, namar ka jingpynlong ia ki skul mynta kala iaid shait shait.
Na ka liang ki paidbah jong ka thaiñ ki buh ka jingkyntu ia ka Power Grid ba ka dei ban pynkhuid noh mardor ia kitei ki khlaw hapoh kine ki khyndiat sngi, khnang ban lait na kino kino ki jingjia ba sngewsih. Ha ka juh ka por kila kyntu ruh ia ki bor sorkar ba dei ia kane ka kam ba kin shimkhia halor kane ka jingma kaba ap ia ki paidbah ka thaiñ.
