Ka lympung ialehkai Sports jong ki khynnah skul kaba la tip kum ka Chief Minister District Level Inter School Athletic Meet 2023, ka West Jaintia Hills District, kaba la pyniaid da ka ophis u District Sports Officer (DSO) West Jaintia Hills District, ryngkat ka jingiatreilang ka West Jaintia District Sports Association (WJDSA), kaba la sdang naduh ka 26.04.2023, kala poi noh sha kaba kut mynta ka sngi 28.04.2023.
Ha kane ka lynmpung kaba la wan ban iashim bynta haduh 31 tylli ki skul napoh ka District kaba la pynlong ha Madan Kiang Nangbah Stadium, Ladthadlaboh Jowai. La wan ban pynhap pyrda ia kane ka lehkai sports da u MLA ka Jowai uba long ruh u Chairman ka MUDA ma Wailadmiki Shylla.
Ha kane ka lympung ia ka nam Over All Champion School la ioh rah da ka North Liberty Higher Secondary School, Jowai katba ia ka nam Best Discipline School la ioh rah da ka St: Marry Mazzarello Scondary School Jowai.
Ha kane ka lympung la sam ruh ia ka khusnam sha ki Best Athletic ha ki kyrdan Under-14, 16 bad 18 na ka bynta ki khynnah shynrang bad khynthei.
U ma Wailad haba kren u la ong ba u dap da ka jingkmen ban iohi iaki khynnah skul ba ki iashim bynta ha ki jingialehkai bapher bapher ha kane ka lypung kiba don shisha kata ka sap, kumta na ka liang jong u, u la kyntu jur ia ki ba kin long kiba trei shitom shuh shuh ha ka sap ba ki don, bad kam dei ba kan kut tang hangne.
U ma Wailad ula ai khublei ruh ia ka ophis jong u District Sports Officer WJHD, kumjuh ia ka WJDSA kiba la lah ban pyiaid beit iaid ryntih ia kane ka lympung kaba la wan ban shim bynta haduh 31 tylli ki skul kaba dei kaba bun duh ki skul ban shim bynta lada nujor ba ki snem ba la leit.
Mynta ka sngi ia ki khusnam bad syrnod sha ki nongjop la sam da u kongsan ma Wailadmiki Shylla, ma K. Passah DSO WJHD, ma E.M.H. Passah Working President WJDSA, ma P. Lamare Vice President WJDSA ha ka jingiadonlang kiwei de kiba la shah khot sngewbha.
