Ka tnad Jowai Municipal Board (JMB) kum ka lad ban ïada ïa ka khuid ka suba jong ka wah Myntdu kala pynshna ïa ki nala bala khot ki ‘In-situ’ ha manla ki dong kiba don ïa ki nala um ba tuid sha ki bynta ka Wah Myntdu bad kane ka kam ka dang ïaid shait shait mynta ha sor Jowai.
Ha ki bynta jong ka dong Panaliar la shna ïa ki In-situ Nala ha ki ar tylli ki jaka kata ha ki bynta ka Synrang waïong bad ha Urkyrdaiñ bad ha kane ka 29 tarik ki briew jong ka tnad Jowai Municipal Board naduh u Chairman ma L.D. Lakiang, ka CEO Jowai Municipal Board kong D.V. Lyngdoh, MCS, ki waheh ka Seiñraij Jowai ryngkat u President ka Khooid Ya ka Wah Myntdu ma Khroo Lamsalanki Pariat, ki dkhot ka Jaiñtia Fishing & Environment Protection Association kila pynlong ka jingleit jurip ïa kitei ki Insitu-Nala.
U ma L.D. Lakiang ula pynsngew ba ka Board kala buh ïa ka thong ban pyndep ïa kitei ki Nala hapoh u bnai May 2023 bad yn shna ruh ïa kum kine ki nala In-situ sha kiwei de ki dong khamtam ha ki bynta ba tuid ki um liar sha ka wah Myndu.
Ha kaba ïadei bad ka rukom shna ïa ki Septic tank ha manla ki thliew ïing ula ong na ka liang ka Jowai Municipal Board kala ai jingïarap sha ki longïing kiba donkam ban shna ïa ki Septic tank.
U Khroo Lamsalanki Pariat, President SKYM ula ong ba ka jingshna ïa ki In-situ Nala kan ïarap ban ïada kumba 80% ïa ki jaboh ban leit tuid sha ki bynta ka wah Myntdu, u kyrmen ba kane ka jingpyntrei ïa kine nala um da ka Jowai Municipal Board ha ryngkat ka jingïatrei lang bad ki Dorbar Shnong kan long ka jingkyrkhu bah ïa ka shnong Jowai.
Kum ban shu pynkynmaw ka Sorkar Jylla lyngba ka tnad Jowai Municipal Board kala ïaleh ban bud ryntih ïa ka jingbthah jong ka NGT hadien ka jingujor jong uwei na ki nongshong shnong ma S. Laloo pyrshah ïa ka Sorkar na ka bynta ka jingkhuid jingsuba ka wah Myntdu.
