Ka Sorkar Meghalaya lyngba ka Labour Department kala rakhe burom ia sngi jong ki nongtrei bylla lane ka International Labour Day kaba la pynlong ha ka 1.5.2023 ha Raj Bhawan, Shillong ha ka jingiadonlang u Lat ka Jylla u Paghu Chauhan kum u kongsan ryngkat ki ophisar sorkar bapher bapher.
Ha kum kane ka sngi ka tnat Labour kum ka dak jong ka jingsngewnguh bad burom ia ki briew treimon sngewbha kiba don bynta ban ialamkhmat bad trei na ka bynta ka bha ka miat jong ki nongbylla sngi ka ju pynkup burom ia ki ha ka jingialang ba kyrpang jong ka.
Ha kane ka kynti uwei na ki samla rangbah napoh ka nongbah Jowai u Khroo Lamsalanki Pariat, udei uba shong ba sah ha Tympang Iawmusiang Jowai ruh ula shah pynkup burom ha kane ka sngi rakhe ia ka International Labour Day ha nongbah Shillong.
Ia u ma Khroo la pynkup burom halor ka nongrim jong ki kam kiba u la leh na ka bynta ka jingmyntoi jong kiba bun ki nongtrei bylla sngi, kum ka jingdawa ban pynkiew ia bai nong trei jong ki, kumjuh ruh ka jingpynioh jingmyntoi ia ki khun ki kti jong kine ki nongbylla. Ha ka juh ka por ula don bynta ruh ha kaban ialeh ban pynkiew ia ka jingai honorarium ka sorkar sha ki nongshet ja sngi (Cook) ha ki skul bapher bapher jong ka jylla Meghalaya.
Kiwei de kiba la shah pynkup burom ha kane ka sngi ki kynthup ia ka Sister Delina Lyngdoh, Missionary Sister of Mary Help of Chirstians bad u bah R. Thabah, Secretary AITUC, Shillong.
Ha kane ka sngi la sakhi lang naduh u Dr. BDR Tiwari, IAS, Commissioner & Secretary ka sorkar Jylla ba dei peit ia ka tnat Labour bad kiwei de ki kynrem ki lyndan jong ka sorkar Meghalaya.
