U Duma ym tang ba u pyniap ia ki nongpyndonkam hynrei u pynsniew ruh ia ka Mariang
Ia ka World No Tobacco Day la ju rakhe ha ka 31 tarik u bnai May man la ka snem ha ka pyrthei shityllup. Mynta u snem ka phang pdeng ba la jied hapoh ka jylla Meghalaya ka kong “My Meghalaya, Tobacco Free Meghalaya”. Ia kane ka campaign la sdang ha East Jaiñtia Hills District.
I Dr. Lana L. Nongbri iba dei i State Nodal Officer, National Tobacco Control Program, Department of Health, Government of Meghalaya ila ong “U Duma ym tang ba u pyniap ia ki nongpyndonkam hynrei u pynsniew ruh ia ka mei Mariang, ia ki jait jingbam ne jingdih na u Duma la pyndonkam 47 % da kiba ha ka rta kaba 15 snem shaneng hapoh ka jylla Meghalaya. Kane kala pyniap haduh 8000 ngut ki briew hapoh ka jylla man la u snem. Kumta ha kaba iadei bad kane la btah ia baroh ki skul ban kin pynlong ia ki rally pyrshah Duma bad ki signature Campaign. Kane ka campaign ka long ruh shi bynta na ka Tobacco Free Educational Institutions (ToFEI) kaba la sdang hapoh ka jylla naduh u snem 2021 ha ka jingiatreilang bad ka Sambandh Health Foundation. Mynshem kane ka campaign ka long kaba jop bad mynta u snem ngi kwah ba ym tang khynnah skul bad ki nonghikai, kin iashim bynta hynrei la kyntu ruh ia ki nongshong shnong ban iashim bynta lang”.
Ka jingiap jong ki briew man la u snem na ka ba pyndonkam ia u duma ha baroh ka pyrthei ka kot sha ka 7 million ngut bad tang hapoh India ka la kot sha ka 13.5 lak ngut. Kumba 560 tylli ki karkhana sikaret ha ka pyrthei bad na kine ki pynmih haduh 6 trillion tylli ki sikaret man la ka snem. Kane ka wanrah ka jingpynjot ia ki khlaw, ka pynmih ia ki jakliah ba bun bad kaba kham sniew ka long ba kit dong jong u sikaret ki long ki ktah bha ia ka mariang namar ba kim kylla pyut.
Haba kren pdiang ia ki skul, u Deputy Commissioner ka East Jaiñtia Hills District u Abhilash Baranwal, IAS u ong ba u Duma u dei ka lynti sha u Drok. Ula pynkynmaw ha mynshem snem ia kane ka prokram la iashim bynta da 398 tylli kiba la leh ia ki rally, 213893 tylli ki sign la ioh bad palat 24,950 ngut ki khynnah skul kila iashim bynta. Mynta u snem na ka liang jong ki bor pyniaid District kila kyntu ia ki skul ban pynlong ia ki rally bad ki signature campaign. “Ngi sngewsarong ia la ka jong ka jylla bad ngin leh ia kiei kiei na ka bynta ban iada ia ka Meghalaya ba itynnad jong ngi na ka jingktah jong u duma la ha kano kano ka rukom”.
