Ka lympung ialehkai Sports jong ki khynnah skul kaba la tip kum ka Chief Minister District Level Inter School Athletic Meet 2023, jong ka East Jaintia Hills District, kaba lai sngi lynter ka bala sdang naduh ka 02.05.2023, kala poi noh sha kaba kut mynta ka sngi 04.05.2023.
U Superintendent of Police jong ka East Jaintia Hills District u Jagpal Singh Dhanoa IPS, ula wan ban khylliap ia ka lama jong kane ka lympung, kaba la pyniaid da ka ophis jong ka District Sports Officer EJHD ryngkat ka jingiatreilang ka East Jaintia District Sports Association (EJDSA), kaba la pynlong ha Teilang Playground Dkhiah bad ha kane ka lympung lawan ban iashim bynta haduh 800 ngut ki khynnah na ki 30 tylli ki skul bapher bapher jong ka East Jaintia Hills District.
Ha kane ka jingialehkai Sports la don ki jingiakop kiba kynthup ia ka jingmareh 100 Meters, 200 Meter, 400 Meter, 600 Meter, 800 Meter, 1500 Meter, Long Jump, High Jump, Shoot Put, Discuss throw, Javelin Throw bad Medley race. Ha kane lympung la bynta ruh ia ki khynnah ha ki lai kyrdan kita Under-14, Under-16 bad Under-18 na ka bynta ki shynrang bad kynthei.
Ha kane ka lynpung mynta u snem ia ka nam Champion Team ha ka liang ki shynrang la ioh rah da ka Sein Jait Tuber Higher Secondary School, kaba la ioh khur 10 tylli ki takma Ksiar, 9 tylli ki rupa bad 3 tylli ki takma rnong, katba ha ka liang ki khynthei pat ia ka nam Champion Team la ioh da ka Sham-Sham Secondary School kaba ioh khur 5 tylli ki takma ksiar, 5 tylli ki rupa bad 4 tylli ki rnong. Ia ka nam best discipline school pat la ioh da ka Sein Raij UPS Mukhailong. Nalor kine la sam ruh ia ki khusnam sha ki best Athlete ha ki kyrdan Under-18, under-16 bad under-14 na ka bynta ki shynrang bad khynthei.
Mynta ka sngi la donlang ruh ka DSO EJHD kong S. M. Rapsang, DSO Nongstoin kong Balarina Syiem, General Secretary EJDSA ma Coming Tlang, officer ka Directorate and Youth Affair kong Darleen Khonglam, ki officer Social Welfare, ki nongkit kam ka EJDSA kumjuh ruh na ka WJDSA bad kiwei de.