U Myntri Rangbah ka Jylla u Conrad K Sangma mynta ka sngi haba kren ha ka jingialang lehburom (Felicitation Programme) halor ka jinglah jong ka sorkar ban sdang noh ia ka scientific mining hapoh ka jylla hapoh ka jingialam jong u kum u Myntri Rangbah, da ka jingioh license jong saw ngut ban sdang biang ia ka jingtih Dewiong hadien kumba 9 snem ei ei bala shah khang kata naduh u snem 2014, u la ong ba ka jingioh jong kine ki saw ngut iaka license ban sdang tih ia u dewiong kat kum ka juk saian kan ai jingmyntoi ym tang ia kitei kiba ioh license hynrei iaki ba bun ba lang bad ia ka jylla hi baroh kawei bad kane ka long ka jingkmen kaba khraw ia ka jylla baroh.
Shuh shuh u la ong ba kin dang don shuh ki ban ioh ia ka license ban tih dewiong nangne sha khmat hynrei dei ban long kiba iai shah, na ka bynta ba ka jingkamai kajih kan long biang kumjuh kumba ha ki por mynshwa, hynrei kane kam long kaba suk ngi hap ban iaid lynti shibun ki jingeh ba har rukom namar ym tih ia u dewiong kan long da kawei pat ka rukom ym shuh kum mynshwa namar kane ka long katkum ka juk stad saian. U la ong ba kane ka dei ka jingtrei shitom jong ka sorkar kaba don ka jingpyrkhat ia u ba bun balang bad da ka jingtrei shitom kaba tyngeh haduh katta katta la ioh ban rakhe ia kane ka sngi mynta, u la ong ba ka sorkar MDA-2, ym tang kane ka kam ka la trei tyngeh hynrei ha ka liang ka kam jngoh kai pyrthei, ka kam Sports, ka tem ka put bad ha kiwei de ki liang. U la ong ruh ba kane ka sorkar jong jylla Meghalaya kaba mynta ka la ioh ruh ki jingiaroh na ka sorkar kmie ha ka jingiadei bad ka jingpyntrei hok bad pyndep iaki skim bapher bapher. U la ong ruh ba ka sorkar ba mynta ka don ka thong ban kyntiew ia ka jylla Meghalaya ha baroh ki liang.
Mynta ka sngi la donlang ruh u symbud myntri ka jylla u ma Sniawbhalang Dhar, uba la ong ba kane ka dei ka sngi sah jingkynmaw hadieng ka jingshah khang ban ti ia u dewiong ha ka NGT, kaba la wan rah ka jingduh nong kaba khraw haduh katta katta ym tang ia kiba donkti ban trei ia u dewiong hynrei ha baroh ki kam ki jam jong ki briew kala hiar tang na ka daw jong u Dewiong, kata naduh ki dukan sha dukan ja bad kiwei dukan die jhur die doh, ki draibar kali bad kiwei kiwei de. Kumta na ka liang jong u la ong ba hadien ba la ioh biang ia kane ka lad ban sdang tih biang ia u Dewiong ngim dei ban leh shongshit hynrei ngi dei ban bud ia ki ki kyndon ba la phah, katkum ka Scientific mining.
Mynta ka sngi la ioh ruh ia ki jingkren na u Deputy Commissioner East Jaintia Hills District u Abhilash Baranwal, ma Balios Swer Coal Miner, ma Nehlang Lyngdoh uba long Grantor Landowner bad uba ioh ruh ia ka mining License, kong Santamary Shylla MLA Sutnga Saipung, bah E. Kharmalki IAS Secretary Mining & Geology, ha ka jingdonlang u SP, EJHD u Jagpal Singh Dhanoa IPS, ki Projcet Proponent ma Dapmian Shylla bad Leborlang Lyngdoh.
