Ka tnat Basin Development jong ka East Jaiñtia Hills District ha ryngkat ka jingïatreilang bad ki tnat jong ka rep ka riang, ka la lah ban phah khyndai ngut ki nongrep kiba napoh ka East Jaiñtia Hills District ha kaba ki la lah ban pyndep ïa ka jingshah hikai jong ki ha ka ka rukom rep Hydroponic, kaba ki la ioh jinghikai na ka shlem ai jinghikai kaba don ha Siliguri-West Bengal.
Ki khyndai ngut ki nongrep kiba la pyndep ïa katei ka jingshah hikai ki dei ka kong ïahphang Dkhar, ka kong Morning Suchiang, kiba na Tuber Sohshrieh, kiba dei ka nongrep soh strawberry kaba paw ha ka jylla, ka long Kyrsiew Ryngkhlem, ka kong Saphalang Dkhar, ki nongrep kiba na shnong Wapungskur, u bah Robin Siangshai, uba na shnong Mynkre, u bah Samuel Latam, uba na Mynthlu, kiba dei ki nongrep jhur, u bah Erick Dkhar, u bah Jimris Langstang kiba na shnong Narwan, kiba dei ki nongrep sohñiamtra bad u bah Dibait Dkhar, uba na shnong Jalyiah, uba dei u nongrep.
La synran lang ïa kitei ki nongrep da ki heh sorkar jong ka District ba kynthup u Extra Assistant Commissioner cum Nodal Officer, EJHD, u bah Raja Brahma, MCS, u District Project Manager jong ka tnat Basin East Jaiñtia Hills District, u bah Hun Ioo Blah, u Programme Associate jong ka tnat Bsin, u bah Hamlish Lyngdoh bad ka District Horticulture Offficer East Jaiñtia Hills District, ka kong Bamerishisha Rymbai.
Katkum ka jingpashat jingmut na ka liang ka tnat Basin Development Unit jong ka East Jaiñtia Hills District, la ong ba ka kiba bun ki jaka ha East Jaiñtia Hills District, ki dei ki jaka kiba la kylla shrah, kiba la duna ki jingthung jingtep bad duna ki jaka rep namar ba ka dei ka thaiñ kaba don bun tang u dewïong (Coal Belt Region), kumta ka long kaba eh ban kyntiew ïa ka jinglong jingman ha ka thung ka tep (Socio-Economic Condition), te kumta ka tnat ka la shim ïa kane ka sienjam ban wanrah da kawei pat ka rukom rep khnang ban dup kyntiew ïa ka ïoh ka kot jong ki paidbah kiba im da ka rep ka riang.
Ka jingkiew stet ka technology, kum ka Hydroponic, ka rukom rep ka bym donkam khyndew kaba tang da ka um (Soil less farming) bad kawei pat ka rukom rep ba ju tip kum ka Drip Irrigation (Optional of using non soil base media), kane kan wanrah ïa ka jubab halor ki jingeh ba ki nongrep ki ju ïakynduh na ka daw ka jingduna ka um, ka jingshah ktah ha ki jakhlia (Pollution) bad kiwei kiwei ki jingshah ktah bad kine ki rukom rep kin long ruh kiba lah ban pynneh ïa ka rep ka riang na ka pateng sha ka pateng.
Halor ka jinghtmu ban wanrah ïa ka jingkhie im ka rep ka riang ban sah ka khana ha East Jaiñtia Hills District, ka tnat ka la jied ia kitei ki khyndai ngut ki nongrep kiba radbah kiba na ka District bad ïa kitei ki heh sorkar ha kaba ki la ïoh ki jinghikai na ki shlem ai jinghikai na Siliguri-West Bengal ha kaba ïadei bad ka rukom rep Hydrophone bad ka DRIP Farming (Kaba shu pynjaw um da ki pipe ia ki jingthung).
Kane ka jingioh jinghikai kitei ki nongrep, ym dei tangba ki ïoh ïa ki jinghikai ha ka jingthoh (Theory) hynrei ki la nang ruh ban leh ïa katei ka rukom rep ha ki jaka rep jong ki bad kane ka ai mynsiem bad ka ktik jingmut ïa kiwei kiwei ruh ki paralok nongrep ban kin sdang lem ïa kaba kum kane ka rukom rep.
