Kum shi bynta ban rakhe ne lehkmen ia ka ‘Azadi Ka Amrit Mahotsav’ bad ‘Legal Services Week’ ka ophis jong ka District Legal Services Authority, ha ka jingiatreilang bad ka ophis jong u Superintendent of Police kumjuh ruh bad ka ophis jong ka District Child Protection Officer, District Child Protection Unit, West Jaintia Hills District, mynta ka sngi kila pynlong ia ka programme halor ka sngi ki khynnah khynthei ne ka International Day of Child Girl. Ia kane ka programe la pynlong ha phyllaw jong ka Jowai Police Station, Iawmusiang Jowai.
Mynta ka sngi la ioh ia ka jingbatai bniah halor ka jingiada ia ki kynnah khynthei da u D. Lamare Advocate, uba la ong ka jingshahlehbeiñ leh khoh ki khynnah kynthei ka don ha kiba bun rukom, u la ong bun ki briew kiba ngat ha ka jingshah lehbeiñ leh khoh ki khun jong ki ne kiba ha iing hasem jong ki, kum ha ka jingshah leh beijot ne shongkha jubor ia kynnah khynthei ba dang hapoh ka rta 18 snem, ki tieng ne kim juh nud ban wan sha khmat. U la kyntu ia ki ba ki dei beit ban wan sha khmat ban pyntip sha ki pulit ne sha ka ophis jong ka DSLA, u la ong ruh ba don ki briew kiba tieng ban leit ujor FIR khamtam kiba na nongkyndong haba ki ngat ha kane ka apot da kaba mut ba kin hap lut pisa bad kin ia kynduh shi bun ki jingeh, hynrei u ma Lamare u la ong haba ujor kum kane ka FIR kaba iadei bad ka jingshah leh beijot bad kiwei de ki kam lehbein ia ki kynnah kynthei ha ki pulit ym donkam ban siew ei ei ruh, bad lada ki nongujor kim long kiba nang ban thoh ban tar dei ka kamram jong ki pulit ban ia rap ia ki nadong sha dong.
Shuh shuh u la ong don ki case haba sha leh bein ki khynnah kynthei ki trai iing trai sem ba shah lehbein khamtam kiba duk, ki shu hap ban sngap da ka jingpyntieng ha ki nongleh ne don ruh kiba shah pynbiej da pisa hynrei u kyntu jur ban ym dei ban shu shah pynbeit hynrei ki dei ban wan sha khmat jong ka ain na ka bynta ka hok jong ki. U la ong ruh ba ka jingshah leh bein ki khynnah khynthei kam dei tang na liang u shynrang hynrei wat ki khynthei ruh don kiba lehbein leh khoh ia ki khynnah khynthei da kaba ki die ia ki bad pyndonkam ia ki na ka bynta ka jingmyntoi jong ki.
Ha kane ka sngi la ioh ruh ia ki jingkren na Officer Incharge ka Jowai PS u B. Marak, Kong M. Mawlong Protection Officer DCPU Jowai Unit, Kong R. M. Kharsyntiew MJS Chief Judicial Magistrate-Cum Secretary DSLA, kong I Kharpran Women Police, J. Niang PLV ha ka jingiadon lang kiwei de ki nongtrei ka DSLA, ka tnat pulit bad DCPU.
