Ka Jaintia Hills Development Society (JHDS) ha ryngkat ka jingiatreilang bad ka Ophis jong ka District Social Welfare Officer ka West Jaintia Hill, mynta ka sngi ka la pynlong ia ka awareness prokram hapoh ka Hall jong ka Skul Tpep-pale Secondary School Jowai, ban pynshai ha ki khynnah skul halor ki jingma u Drugs ka kiad bad kiwei de ki jingdihpynbuaid kiba la jyllei bha hapoh ka sor Jowai.
Ha kane ka sngi la ioh ruh ia ka jingbatai halor ka Nashamukt Bharat Abhiyan, kaba dei ka skim jong ka Sorkar Kmie ban pynduna ia ka jingdih drugs ia kaba la ai da ka kong J. Synnah, District Social Welfare Officer West Jaintia Hills. Ka kong J. Synnah ha ba ai jingkren ka la ong ba ki don haduh 272 tylli ki District ha baroh kawei ka Ri India kiba la niew ba kidei ka District kiba kynrei palat ka jingdih drugs bad ka West Jaintia Hills District ka dei kawei na kita ki District. Shuh shuh ka la ong ba ka Sorkar ka la pyrshang ban rat dieng khong ia kane ka jait jingpang ba shyrkhei lyngba ki skim bapher bapher bad ka Nashamukt Bharat Abhiyan ka dei kawei ka thong kaba ka Sorkar India ka la ialeh katba lah ban pynduh jait ia kane ka jingmlien basniew.
La ioh shuh shuh ia ka jingbatai ba bniah halor ka jingktah u drugs bad ki jingdih pynbuaid ia kaba la ai da u Bah Terence Sawian, uba dei u wei na ki riewshemphang ba la tbit bha ha kane ka phang. Shuh shuh ha kane ka sngi la pyniphuh iphieng bad pynkham ngam jylliew shuh ia ka jingma jong u drug lyngba ka drama lyngkot da ki khynnah skul jong ka Tpep-pale Secondary School Jowai.
Shuwa kane ka prokram la don ruh ka jingiaid rally halor kajuh ka phang ba la ia shym bynta da ki kynnah skul jong katei ka skul ia kaba la sdang na ka shnong Tpep-pale, Dulong, Iongpiah, Pohskur bad pynkut hapoh phyllaw jong kane ka Skul.
