Ïa ka lympung ïalehkai phutbol ba heh duh hapoh ka jylla kaba la tip kum ka Meghalaya State League (MSL) 2023, la wan ban plie mynta ka sngi Thohdieng da u myntri ka Sports & Youth Affairs ka sorkar jylla u bah Shakliar Warjri ha ryngkat ka jingdonlang u MLA ka thaiñ ma Wailadmiki Shylla ha madan Kiang Nangbah Stadium Jowai.
La pynshong shit shuh shuh ïa kane ka sngi da ki jingïalehkai da ki kynnah skul ki jingshad (drill) bad ki jingrwai kiba la pynhun shisha ïa ki nongwan peitkai ha kane ka sngi sdang ïa ka lympung MSL mynta ka snem 2023.
Haba phai sha ka jingïakhun mynta ka sngi hapdeng ka Ñiaw Wasa FC pyrshah ïa ka Rangdajied Utd FC ha ka por 3 baje nohphai sngi, na ka liang ka kynhun ïalehkai jong ka Rangdajied Utd FC kala jop da 2-0 kol, ïa kitei ki kol la thep da u Wanlamsuk Nongkhlaw ha ka minit kaba 34 jong ka kylla step bad u Damehun Syih ha ka minit kaba 60 jong ka kylla miet.
Ka jingïakhun hapdeng kine ki ar kynhun kala long kaba ïakhait bad kaba itynnad bha namar baroh ar liang kila pynpaw shisha ïa ka sap ïalehkai kaba ki don.
Ka jingïakhun lashai ka sngi 13 tarik kan long hapdeng ka Youth Club Pdengkarong pyrshah ïa ka Rymbai Iawpynsing SC ha ka por 12 baje mynsngi, katba ka Ladthaadlaboh SC pyrshah ïa ka Seinpynbhalang SC ha ka por 3 baje nohphai sngi.
Ha kane ka lympung kila don haduh 25 tylli ki kynhun kiba ban ïakhun ban ïoh rah ïa ka nam lahduh mynta ka snam 2023 kan long ha Nongbah Shillong ha u bnai June.
