Ka Hynñiewtrep Border Disputed Redressal Forum (HBDRF) mynta ka sngi kala leit ban aiti ïa ka dorkhas sha u Deputy Commissioner ka West Jaiñtia Hills hynrei na ka daw ka jingbunkam u DC kila ïoh ban aiti ha u Addl. Deputy Commissioner ma Mark Andrew Challam, MCS ha kamra treikam jong u.
U ma C. Sungoh Chairman ka HBDRF ha ka jingkren sha ki lad pathai khubor ula ong hadien ka jingïakynduh bad u Add. DC u la pyntip ba lashai ka sngi 16 tarik kan don ka jingïakynduh jong ki ar District naduh ki DC ryngkat bad ki SP, ha kaba kin ïashim ïa ka rai ban khot ïa ki nongshong shnong, nongïalam shnong jong ki Khasi Pnar bad Karbi ban wanrah noh ïa ka jingshongsuk shong shngaiñ ha kitei ki jaka.
Ha kaba ïadei bad ka jingïakynad kaba mih na ka daw ka jaka lum khajna na ka (Tax Gate) jong ka KAAC kaba la neh la shibnai tam mynta, na ka liang ka seng kala kyntu ba dei ban shimkhia mardor ïa kane bad ban wanrah noh ïa ka jingshongsuk shnong shngaiñ hapdeng jong ki, ula pynsngew na ka liang ka Forum ruh ka kloi ban ïatreilang.
U ma Sungoh ula ong kum ka seng ka dap da ka jingsngewkhia halor kane ka jingmih huri hura kata ha ki ar jaka ha Moothade bad Moojem bad hapdeng ki shnong Khanduli bad Karbi, kum ka Forum kam kwah shuh ba kum kine ki jingïakynad ki wan jia biang.
Ula pynkynmaw ha ka 19 tarik u Ïaïong mynta ka snem kala don ka jingïalang hapdeng ki ar District, hynrei kaba sngewphylla ka long ba ka DC jong ka West Karbi kala kam ba ka Khanduli kan dang hap shapoh Assam bad ïa kane ka seng kam lah ban pdiang da lei lei ruh em.
Ha kawei ka liang ban wad ïa ka jingshisha halor ka jingkynnoh ki Karbi ba dei ki Pnar kiba wan rah jingklumar ha ka shnong Myn-i ha Samymthoo bad kiba la shoh ïa ki Karbi bad thang ïa ki trep lyngkha hynrei kane ka long tang ka jingkynnoh na ki Karbi, na ka liang ka seng kala leit hiar mardor sha kitei ki jaka hynnin ka sngi ban tohkit hynrei ka daw hi ba mih ka jingïakhajia jong ki ka long na ka jingwan buh ïa ka jaka lum Khajna (TAX) ha Khanduli.
Ula kyntu ïaki bor sorkar ba kin khot noh ïa ki arliang mamla ba kin wan sha ka jingïasngewthuh jingmut lang na ka bynta ban wanrah ïa ka jingshong suk shong shngaiñ hapdeng kine ki ar jaitbynriew khnang ba ki paid Pnar kiba shnong ha Block-1 ruh kim dei ban shah pyndik bad kumjuh ïa paid Karbi kiba sah shapoh Meghalaya kumjuh.