Remdor ki dieng hapoh Jylla naba jur ka jingshalan tuh shapoh jylla Assam: FKJGP-KC

Ka Seng FKJGP-Khliehriat Circle (FKJGP-KC) ha kine ki sngi kala ioh shibun ka jingujor na ki paidbah haba iadei ka jingrem palat ki dor dieng kum ki lyntang, ki dieng shna ïing bad kiwei kiwei ki jait dieng hapoh ka thaiñ Khliehriat, East Jaiñtia Hills, kum ban shu pynkynmaw mynshwa ki jait dieng shna ñing ha ki thaiñ Ladrymbai ka poi tang 180 haduh 200 tyngka shi kubit  hynrei mynta haduh 700-800 tyngka shi kubit kane kala pyllong ia ka seng ban wad ia ka daw tynrai ba la kiewdor ki dieng.
    Haka jingwad jingtip kaba tikna, ka seng ka lap ba ia ki jait dieng ba juh pyndonkam ha ka ban shna ïing shna sem la shalan tuh baroh shapoh Assam khlem ki kot ki sla ba biang, ka jingkwah jong ki trai Saw Mill kiba don hapoh Jaiñtia ban die ia ki dieng shapoh ka jylla Assam kadei namar ba ka Assam ka lah ban  thied ha ki dor baheh baheh, ka jingdawa dieng ha Assam ruh ka long kaba jur bha bad kane ka pyllong ia ki dukan die dieng kiba don hapoh ka jylla ban pynkiew dor namar ba ka jingshalan tuh iaki dieng shapoh ka Assam ka long kaba jur bha haduh katta katta.
Kane ka jingpynbiang dieng ia ka Assam kan buh jingma iaki khlaw ki btap ka jylla Meghalaya bad kane kan pyllong ia ka jylla Meghalaya ban thied dieng kylla na kiwei ki jylla, ynda ki dieng jong ka lylla ki lut bad kane ka buh jingma ruh ia ki briew la jong khamtam kito  kiba duk ba rangli ban shem jynjar ban ioh thied dieng na ka bynta ban shna iing shna sem.  Kine ki nong shalan tuh ia ki dieng wat lada kim don iaki permit ne Challan kiba biang ruh hynrei kin lait da kaba suk ha baroh ki Check point la ka dei jong ka tnad Forest ne ki check point jong ki Pulit namar ba la don ka jingiasngewthuh jingmut.
      Khatduh ka Seng ka kyrpad ia ka tnad Forest khamtam ban peitngor bad ban ym ailad ia ka jingshalan tuh ia ki dieng shapoh ka Assam bad ka seng ka maham ruh lada ka lap nangne sha khmat kan kem bad aiti sha ki bor ka aiñ, pynkut ka kyrwoh na u President ka FKJGP-Khliehriat Circle u bah Michal Chyrmang.