Ka St. Marry Mazzarello Girls Hr. Secondary School, Jowai kum shibynta ban ai lad ia ki khynnah ban iadon bynta lang ha ka Bharat Scouts-Guides Movement mynta ka sngi, hapoh ka jingpyniaid jong ki ar ngut ki Guide Captain ba knthup ia ka Modistalin Marbaniang bad ka Caredalin Kharbhih ki la pynlong ia ka investiture Ceremony lane ka jingpynrung dkhot ia ki khynnah skul.
Ia kane ka prokram la sakhi lang da u ma Adiam U Bthuh, District Secretary MBS&G, West Jaintia Hills kum u kongsan ha ka jingiadon ryngkat ka Principal Sr. Teresa Phawa kum ka symbud kongsan, ka Chwadaka Laloo Guide Captain bad ki nonghikai.
Ia ka jingialang la pyniaid da ka Caredalin Kharbhih, Guide Captain. La ioh ia ka jingkren pdiang burom da kawei na ki khynnah Guide jong ka St. Mary Mazzarello Girls Hr. Secondary School, Jowai, katba ka Chwadaka Laloo Guide Captain MBS&G, West Jaintia Hills, kala kren ai mynsiem ia ki khynnah ryngkat ka jingsneng jingkraw ha ka jingiadei bad ki nongrim treikam jong ka Scouts-Guide Movement.
U Kongsan ma Bthuh haba kren ha kane ka sngi ula ong kum ki khynnah Guides kiba la shim ia ka soskular mynta ka sngi ba kin leh ia ki kam kiba bha na ka bynta ban shakri ia ki para briew bad ia u Blei. Ula kyntu ruh ia ki ba kidei ban long ki khynnah kiba don ia ka thong ban pyndep ia ki kyrdan bapher jong ka Scouts-Guides Movement kat haduh ba kin da ioh ia ka President Award.
La ioh ruh ia ka jingkren kyrpang bad ai mynsiem ia baroh ki khynnah da ka Principal Sr. Teresa Phawa.
