Ki bor pynïaid District na baroh ar liang mynta ka sngi kila pynlong ka jingïalang pynïasuk ha Khanduli BOP Assam, ha kaba la wan ban ïadonlang naduh u Deputy Commissioner ka WJH bad ka DC na ka West Karbi Anglong, ha ryngkat u Superintendent of Police WJH bad kiwei de ki ophisar jong ki ar District.
Ha kane ka jingïalang la ïoh ban ïakren sani bha halor kumno ban wanrah biang ïa ka jingshong suk shong shngaiñ ha kitei ki jaka khappud kiba la mih jingklumar dang ha kine ki sngi ba la dep ha ka shnong Khanduli. La ïakut na baroh ar District ba kin ïatreilang ryngkat tyngkat ban pynwan biang ïa ka jingshong suk ha kitei ki jaka na baroh arliang ki jaitbynriew Pnar bad Karbi.
Ha kane ka sngi kila pynlong ka jingïalang da ka jingïadonlang ki Magistrate na baroh ar liang ki District bad ki nongïalam shnong na ki Pnar bad ki Karbi. Hynrei kiba bun hi kiba wan ki dei na ki paid Pnar katba na ka liang ki paid Karbi kila don tang katto katne ngut kumta kin ym lah ban shim ïa ka rai mynta ka sngi.
La ïoh ruh ban ïakren ha katei ka jingïalang halor ki jingeh kiba mih ha kitei ki jaka khappud hynrei na ka daw ba duna ki paid ba wan na Karbi la pynkut noh ïa ka jingïalang khlem da shim ïa ka rai.
Khnang ban wanrah biang ïa ka jingshong suk ha kitei ki jaka la ïakut ban pynlong biang ïa kane ka jingïalang pynïasuk ha kawei pat ka sngi na ka bynta ban ïakren halor ki lad ki lynti ban pynïoh biang ïa ka jingsuk kumba long ha kipor mynshwa hapdeng kitei ki ar jaitbynriew.