Ka kynhun ïalehkai jong ka Ñiaw Wasa United kala jop da 2-0 kol ïa ka Rymbai Iawpynsing SC mynta ka sngi haka jingïakhun jong ka lympung ïalehkai phutbol ka Meghalaya State League (MSL) 2023 (Jowai Zone) ha madan Kiang Nangbah Stadium Jowai.
Haba phai sha ka jingïakhun kala long kaba ïakhaid bha hapdeng kine ki ar kynhun kila la ïakhun dohïap katba lah ban thep ïa ki kol bad kane kala pynhun ïa kiba nongwan peit kai mynta ka sngi.
Na ka liang ka Ñiaw Wasa United kala ïoh ïa ka kol ba nyngkong lyngba u Buromlang Salahe ha ka minit ba 45+2 katba ïa ka kol ba ar la thep da u Dashngaiñ Sukhlaiñ ha ka minit ba 82. Ka kynhun ïalehkai jong ka Rymbai Iawpynsing SC kala pyrshang ban pynphai kylla ïa kitei ki ar kol hynrei kam lah satia haduh ba kut jong ka jingïakhun.
Ka jingïakhun lashai ka sngi 18 tarik kan long hapdeng ka Seiñ Pynbhalang SC pyrshah ïa ka Rangdajied United FC, ha ka por 2 baje shiteng nohphai sngi.