U MLA ka Jowai uba long ruh u Chairman ka MUDA, u ma Wailadmiki Shylla mynta ka sngi 19.05.2023, u la plie ia ka extention Building jong ka Jowai Municipal Board (JMB) (first floor), ha ka jingia donlang ruh u Chairman ka JMB ma Lasooki D. Lakiang, u MDC JHADC ma Evening Teron (EM), Ailad Bhoi (EM), Octamewot Lamin, ki Waheh Shnong bapher bapher jong ka nongbah Jowai, ki sahep bad nongtrei ka JMB bad kiwei de kiba la shah khot sngewbha. Ia ka jingialang la pyniaid da ka Chief Executive Officer (CEO) Jowai Municipal Board kong D.V. Lyngdoh (MCS).
U ma Wailad haba kren u la ong ba u dap da ka jingkmen ban iohi ba ka JMB, kala nangkiew ha kiba bun ki liang bad kane ka jingpyniar shuh shuh ia ka iing treikam kane ka tnat, kan pynsuk shuh shuh ia ki nongtrei kane ka ophis ha kaba kane ka ophis kan ioh lad ruh ban pynlong ia ki awareness programme bapher bapher namar ha kane ka ïing ba dangdep shna ladon ruh ka Hall ban pynlong prokram namar ka Municipal ka don shibun ki prokram kiba iadei bad ka jingpynsngewthuh sha ki paidbah.
Ha ka jingiadei bad ka jaka bret ñiut (landfills), u ma Wailad u la ong ba lyngba ka jingiatrei lang bad ki tnat bapher bapher ym slem shuh yn ioh noh ia ka jaka bret ñiut na ka bynta ka nongbah Jowai. U ma Wailad u la khot ruh ia ka jingtreilang jong baroh ki Waheh Shong bad ki paidbah ha ka jingiadei bad ka jingwanrah ia ka jingkhuid jingsuba hapoh ka sor Jowai, u la ong ruh kumba long mynta ka JMB kala biang ki jingdonkam naduh ki kali kit ñiut kiba long ha ka juk mynta, ka JCB, ki Tractor bad kiwei, sa tang ban ioh noh ia ka jaka bret ñiut kaba paka bad kumba long mynta ka JMB kam shym la shong kli kti ban pynkhuid ia ki ñiut na sor Jowai da kaba wad bun ki lad ki lynti kat bym pat ioh ia ka jaka ba paka ne permanent.
U la iathuh ruh ba ka JMB ka don ruh shibun ki scheme bapher bapher ban iarap ia ki briew ba shong basah ha sor, kumta u la kyrpat ia ki briew ba ki dei wan mih sha ka ophis jong ka JMB ban tip ia ki scheme bapher bapher kiba kane ka tnat ka don, na ka liang jong u, u la kyntu ruh ia ka CEO ban pynlong ia ki prokram pynsngewthuh paidbah halor ki scheme bapher bapher jong ka JMB.
U Chairman ka JMB u ma Lasooki, u la ong ba kumba long mynta ka ophis jong ka JMB ka don ka scheme ba 12 hajar tyngka ban iarap pynshna painkhana ia ki bym pat don painkhana ne septic tank, na ka liang jong u, u la kyrpat ia kito ki briew ba donkam ba kin wan shim ia kane ka jingiarap jong ka sorkar, namar ym shah shuh ban pyntuid ia um painkhana ha ki duid ne nala ki ban poi sha ki wah bah kiba long ki thyllong um dih umbam.
