Ha ka jingpyllait khubor jong ki nongpyniaid jong ka ‘Ha Rynsan Season 1’ kawei na ki rynsan iakop na ka bynta ki riew don sap naduh ki khynnah, ki samla bad ki riew rangbah ha ki bynta bapher bapher, kila pyntip mynta ka sngi ba ia ka jingthmu ban pynlong ia ka Audition ha nongbah Shillong kaba la thmu ban pynlong ha ka 14 tarik mynta u bnai la hap ban pynsangeh shipor.
Kane ka jinghap ban pynsangeh shipor ia katei ka Audition ka dei na ka daw ba katto katne ngut na ki Nongbishar kiba dei na bar jylla kiba la jied ban bishar ia kane ka Audition ki ioh Covid-19 Positive. Kumta ki nongpyniaid kila iathuh ba na kane ka daw la hap ban pynsangeh shipor katba kin dang wad da kiwei pat ki Nongbishar bad ia kane ka Audition jong ka Shillong la pynkynriah noh sha kaba kut duh jong ki Audition baroh.
Ha ka juh ka por ki nongpyniaid kila iathuh ba kumba long mynta ka Audition sha kiwei pat ki jaka jong ki District bapher bapher kala nang iaid shakhmat. Kumba long mynta la lah ban pyndep haduh saw tylli ki Audition kata ha Mairang, Mawkyrwat, Nongstoin bad ha Umkiang. Hynrei lada don kino kino ki bym ioh lad ban shim bynta ha ki jaka ba ki don na ki daw bym lah kiar, ki lah pat ban wan iashim bynta ha ka Audition ka ban sa pynlong ha nongbah Shillong ha kaba ia ka sngi bad ka tarik yn sa pyntip kham hadien.
