Ka Seiñ Raij Raliang ka la pdiang sngewbha sngewbha ia ki tiar mynbarim kiba la wan ban ai da ki lai ngut shipara kiba kynthup ia u Lambok Singh Lyngdoh, ka Queenvida Lyngdoh bad ka Daplinda Lyngdoh kiba shong ba sah ha Ladthalaboh Jowai.
Ia ka jingialang pdiang la pynlong hynnin ka sngi ha ïing ka Seiñ Raij Chrah-Umphula, la pdiang ruh ia kitei ki tiar mynbarim sha ka Seiñ Raij Raliang na ka bynta ban buh sah kynmaw ha ïing “Booh Tiar Ïongrim” (Museum). Ka Seiñ Raij haba pdiang ia kitei ki tiar kala pynpaw ia ka jingsngew nguh kaba khraw ia kitei ki lai ngut shi para kiba la wan ban ai ia kum kine ki tiar ki bym ju kham iohi shuh ha ka juk ba mynta.
Kine ki tiar kiba la wan ai sngewbha ki kynthup ia u Cher behkpong, ka Wait iada ha ka por thma bad u wei u Ketli sha Nar ba la shna na Ri England. Ha kane ka juh ka sngi ka kong Idalana Lyngdoh na Raliang ruh kala ai sngewbha sha ka Seiñ Raij uwei u khiew stem barit.
Ia ka jingialang ba lyngkot la pyniaid da u President ka Seiñ Raij u ma Binroy Dkhar, katba ia ki kyntien nguh Blei la ai da u Rideiwa Dkhar bad ia ki kyntien pdiang burom la ai da u General Secretary u ma Hamjhan H. Dkhar ha kaba u la ong ba ka jingdon jong kane ka Museum kan long ka jingmyntoi ia ka lawei jong ka pateng ka ban sa wan.
Kumjuh ruh la ioh ia ka jingkren pynshai na u Lambok Singh Lyngdoh, uwei na kiba la wan ai ia kine ki tiar ula ong ba u kwah ban wan buh ia kine ki tiar ha kum kine ki ïing kynshew tiar mynbarim khnang ban don kiba peit ba sumar ia ki ban lait na ka jingjah klep. La ioh ruh ka jingkren na u Dr. M. Tyngkan, u C. Lyngdoh Dolloi Eleka Raliang bad kiwei.
