Diaw u rangbah bym don ki nongmih khmat na East Jaiñtia ban kren halor ka Reservation Policy

U ma Wanshwa Nongtdu uwei na ki  samla rangbah jong ka East Jaiñtia Hills District, uba la ih ha ka kam saiñ hima sima, u kyrshan ba ka Reservation Policy ka long kaba la donkam bha ban pynbeit thymmai noh ia ka na ka bynta ka bha ka miat jong ka jaitbynriew Khasi Pnar hapoh ka jylla Megahlaya, u la ong ruh ba kum ba long mynta na ka liang ka sorkar kam pat ai ki jinghun ia ki paidbah  Khasi Pnar halor kane, ha kaba ki paidbah bad ki seng bapher bapher ki la hap ban pynlong ki jingiamih paidbah ha ki jaka bapher bapher na ka bynta ban pyrshah ia ka Reservation Policy kaba mynta bad dawa ban pynshna ne pynbeit biang ia ka.
U ma Wanshwa u la pynpaw ka jingsngewdiaw halor ka jingbym don ki nongmihkhmat ka East Jaiñtia ban kren halor kane ka jingdawa, u la ong ruh ba ha East Jaiñtia ki Sengbhalang bapher bapher ki nongkyrshan ka VPP bad ki paidbah kila pynlong ka jingmih paidbah bad shong kyllaiñ myngngor ha phyllaw ka ophis u Deputy Commissioner ka East Jaiñtia Hills District, na ka bynta ban ai jingkyrshan ia ka jingdawa ban pynthymmai iaka Reservation Policy ba la lam khmat da u President jong ka VPP uba shah thngan ruh ha jan ka ophis jong Additional Secretariat ha nongbah Shillong, hynrei na ka liang ki nongmikhmat jong ka East Jaintia, kim shem la treh satia ban kyrshan ne ai jingkren ei ei halor kane ka mat kaba dei ka iap ka im jong ka paid ka ri Khasi bad Jaintia.
U la ong ba ym dei ban kyrshan iaka Party VPP hynrei iasnoh kti lang ha kaban dawa ban pynbha ia kane ka RP ba mynta, u la ong bad kyntu ruh ia ki nongmihkhmat kiba don ha kano kano ka party ki dei ban pynduh ka jingsngew iapher party hynrei dei ban pynkhat na ka bynta ka lawei jong ka jingdonkam jong ka jait bynriew.
Na ka liang jong u, u kyntu bad khmih lynti ia ki nongmikhmat ban kin wan sha khmat ha ka ban iakren lang ia kane kam kaba dei kawei na ki mat ba donkam jong ka jaitbynriew Khasi Pnar.  Shuh shuh u la phah ruh ka khubor kitbok kitrwiang  ia u bah Ardent Basaiawmoit u nongialam ba la iaid shakhmat ha ka jingiadei bad kane ka kam.