Ka Jaiñtia Co-ordination Committee for Reservation Policy (JCCRP) kaba kynthup ïa ki seng bhalang ka Jaiñtia Student Union (JSU), Jaiñtia Youth Federation (JYF), Jaiñtia Student Movement (JSM), East Jaiñtia National Council (EJNC), ka Synjuk Waheh Chnong Jowai bad ka Synjuk Waheh Chnong Ri Jaiñtia mynta ka sngi kila sdang ïa ka jingshong kyllaiñ myngngor ha Iawmusiang (Stand Ummulong) Jowai shi bynta ban dawa na ka sorkar ban pynbeit noh ïa ka ‘Reservation Policy’ hapoh ka jylla.
Na ka liang kiba bun na ki paidbah kila ïamih ban ïasnohkti lang kum ka dak ban pynsngew sha ki nongshong shnong jong ka Ri-Lum Jaiñtia, halor ka jingdonkam ban pynbeit thymmai mardor ïa kane ka rukom thung kam thung jam hapoh ka jylla kaba la noh shilliang la kynjoh 51 snem mynta.
Kiba bun na ki nongkren kynthup ïa ki nongïalam sengbhalang, ki nongïalam shnong, ki riew paidbah bad ki riew tymmen kila kynthoh jur ïa kane ka sorkar MDA-2 ba mynta kaba la ïalam da u Conrad K. Sangma kum u Myntri Rangbah. Kiba pynsngew ba ka jingïoh lad jong ki nongïalam Garo ban long ki nongïalam ba hakhlieh ha ka synshar khaddar kim shym la kwah shuh ban ïakren ïa kane ka jingeh jong ki samla kiba dei napoh ka Ri-Lum Khasi Jaiñtia.
Kila ban jur “ba ka por kala dawa bha ïa ka sorkar ba kan pynbha noh ïa kane ka rukom thungkam thung jam hapoh ka jylla, khnang ban lait na kino kino ki jingeh khamtam ïa ki samla wad kam ha kine ki sngi ba mynta, kumba la ïohi kiba buh hi ki khun samla ynda kila dep ïa ki jingpule kila hap ban shong khlem kam khlem jam”.
Shuh shuh kila kynthoh jur ïa baroh ki 7 ngut ki MLA jong ka Ri-Lum Jaiñtia kiba la sngap jar ïa kane ka jingeh jong ki khun samla haduh mynta mynne, da kaba pynrem jur ïa ki jingkular kaba kila khlei ha ki por Election kaba ong ba kin trei na ka bynta ka bha ka miat jong ka jaitbynriew, hynrei ynda kila jop bad ïoh shong ha ka shuki kila klet pat ïa ka jingeh jong ki paidbah.
La pyntip ba ïa kane ka juh ka jingïashong kyllaiñ myngngor (Sit In Demonstration) yn sa pynlong sa ha Khliehriat ha ka 31 tarik bad ha ka 2 tarik ha Amlarem Sub-Division bad ka por ka sdang naduh ka 10 baje mynstep haduh 5 baje janmiet. La ïathuh ruh ba kane ka long tang ka jingsdang ba lada ka sorkar ka dang sngap mynthi kim banse ban shim da kiwei pat ki lad ki lynti ba kham tyngeh.
Ki la kyntu ïa baroh ki nongshong shnong kumjuh ïa ka samla pule ka Ri-Lum Jaiñtia ba kin ïasnohkti lang bad kane ka jingpynbeit khnang ban kane ka jingdawa pynbha noh ïa ka Reservation Policy hapoh ka jylla kan long kaba jop.
Na ka liang kitei ki nongkren ki khlem da klet ban ai khublei ïa u bah Ardent Miller Basaiawmoit uba la mih shakhmat ban pynlong ha jingshah thngan hajan Additional Secretariat Shillong kaba la dap shi taïew mynta, la pynsngew da kitei ki nongkren ba ki ai ka jingkyrshan ba pura halor kane ka jingmih u bah Ardent na ka bynta ka ïap ka im jong ka lawei ki khun ka bri u Hynñiewtrep.
