Dawa ka KSU wapung Unit ban weng noh ia ka kyrteng ki bar jylla ba kam trai shnong ha Moolamanoh EJH
Hadien ba ioh jingujor na ki khun samla ka shnong Moolamanoh, ka KSU Wapung Unit ha ka 12/10/21 hapoh kak jinglam khmat u Deiniwan Lyngdoh President, u Shwari Ryngkhlem General Secretary ba la synrang lang da u Shaniahskhem Dkhar Organising Secretary jong ka KSU Khliehriat Circle ki la leit buh da ka dorkhas ha u Deputy Commissioner jong ka East Jaintia Hills ban pyrshah ia ka jingioh Aadhar Card ki bar jylla ha ka shnong Moolamanoh kaba hap hapoh East Jaintia Hills District.
Na ka liang ka seng ka la kyrpad bad dawa na u Deputy Commissioner ban pyndam noh mardor ia ka kyrteng ki bar jylla kiba kam ialade kum ki trai shnong jong ka Shnong Moolamanoh. Ka seng ka la pynrem jur ia u Waheh Shnong jong ka shnong Moolamanoh ba dei na ka jingai jingbit jong u ia kine ki bar jylla kat haduh ba poi u pud ba kine ki bar jylla ki ioh ban pyndonkam bakla ia ka kyrteng jong ka shnong ha ka jingthep kyrteng ban leh Aadhar Card.
Ka seng ka la kyntu ia ki wei ki Waheh shnong ba ki dei ban khanglad ia ki bar jylla kiba wan ban buhai shnong bad kim dei ruh ba ai kino kino ki syrnot ia kine ki bar jylla. Ka seng ka la pynrem jur ia une u Waheh Shnong ba u la pyndonkam bakla ia ka bor jong u, uba la iaid lait ia ki kyndon aiñ jong ka 6th Scheduled. Ka ba ym lah satia ban pynkup bor ia ki bar jylla (non indigenous people) ban long trai shnong. Kane ka buh jingma ia ki pateng ban wan ba lada bun ki briew kiba shet kylla bad die tad dor sha ki mynder ri kaba lah ruh ban jia kum ba ong u myllung Soso Tham “Ngin sa long ki nongthoh dieng bad nongtong um iano re” kumba la jia mynta ha ka jylla Tripura.