Ka Jaiñtia Students’ Union (JSU) seng kmie hynnin ka sngi ka la leit ban jngoh ia u Bah Ardent Miller Basaiawmoit mynne ka jan miet ban ai jingkyrshan iaka jingdawa ba shong nongrim ban pynkylla iaka RP 1972. Ka seng ka ong ba ka la dei ka por ia ka sorkar ban kan pynkylla noh ia kane ka RP kaba la rim haduh 51 tylli ki snem mynta naduh ba ioh iaka jylla lajong.
Na ka liang ka seng kam treh ban leit sha ka jingialang kaba lah khot ka sorkar ban iakren halor ka Reservation Roster hynrei ka seng ka kwah shuwa ban pynbeit biang iaka RP 1972 bad sa iakren pat iaka roster namar haka RP 1972 ka kren shai ha clause 1.2 ba ki kam kiba ym lah ban pyndap ha u snem ba lait ka kam yn ym lah ban ai bhah biang hadien u snem u ba ar bad naka jingshna kyrkieh ka sorkar ia ka roster lyngba ka Office Memorandum ha u snem ba la dep bad ha kane ka Roster lah don ka clause D ka ban pynduh nong ar shah iaki Khasi Jaintia namar lah shim naduh snem 1972.
Shuh shuh la ong ba kane ka long ban ai lad shuwa ia u Garo ban pyndap ia baroh ki post kiba lait ha ki ophis sorkar bad kane kan pynduh nong arshah iaki Khasi-Jaintia namar haduh ban da dep pyndap iakine ki post kiba lait da ki Garo bad kane kan shim por haduh 30 snem iaki Khasi Jaintia ban ioh rung kam biang ha ki ophis sorkar.
Kumta ka seng ka dawa jur ba ka por ka lah dei ban pynbeit biang iaka Reservaation Policy 1972 namar kam iahap shuh bad ka juk mynta namad ka lah noh shiliang shaba palat bad dei ban khmih noh ban ioh bhah kaba ym noh shilliang ban ioh kam ioh jam ki pateng kiba dang wan ha ki ophis sorkar ka jylla.