Ka jingpynsngew thuh paidbah ia ka Reservation Policy mynta ka la suh thied ruh sa sha ki thaiñ nongkyndong, ha kaba mynta ka sngi ia ka jingpynshai halor kane ka Policy bhah kam bhah jam bad ka jingkyrshan na ka bynta ban pynthymmai (Review) ia ka RP, la pynlong ha iew ka shnong Chiehruphi jong ka East Jaiñtia Hills, ha ka jingialang kaba la pyniaid da u Waheh Shnong kane ka shong u ma Phrom Rymbai ha ka jingiadon lang kiwei de ki rangbah na ki para jan shnong kane ka thain ryngkat ki paidbah bad ki placard ba pynpaw ia ka jingkyrshan ka jong ki ia kane ka jingdawa, kaba la lam khmat da u nongialam ka VPP u bah Ardent Basaiawmoit.
Ha kane ka jingialang la ioh ki jingkren na u ma Wanshwa Nongtdu uwei na ki samla rangbah na ka shnong Mynkre East Jaiñtia Hills District, u ba la ong ba kane ka Resevation Policy ka mynta ka long kaba donkam shisha ban pynbeit thymmai noh iaka na ka bynta ka bha ka miat jong ka jaitbynriew Khasi Pnar hapoh ka jylla Megahlaya. U la ong ruh kumba long mynta kane ka Policy mynta ka rukom bhah ka long 40% ia ki paid Garo, 40% ia ki paid Khasi Pnar, other ST 5% bad ki General Category 15%, hynrei u la ong mynta kam iahap shuh namar mynta ka jingbun jong ki briew ka la nangbun nangbun.
U la ong ruh ngi khlem wan ha kane ka jingialang na ka bynta ban ai jingkyrshan ia ka VPP kaba la lam khmat ia kane ka jingdawa, hynrei na ka bynta ka jingdonkam jong ka jait bynriew hynñiewtrep, hynrei u la ong ba ngi ai ia ka jingkyrshan ia u bah Arden u nongialam ka VPP u ba la don shisha kata ka mynsiem bad jingmut kaba skhem ban ialeh na ka bynta ki jingdonkam jong ka jait bynriew Khasi Pnar uba la ialeh ym na ka bynta ialade ne ia ka Party jong u hynrei na ka bynta ka jait bynriew.
Na ka liang jong u, u la kyntu ruh ia ki nongmihkhmat kane ka thaiñ naduh ki MLA, MDC bad kiwei de ba kin mih shakhmat bna ka bynta ka jait bynriew.
Na ka liang u ma Firstbornson Nongtdu uba na Khliehriat, u la ong ba wat lada ngim lah ban poi sha Shillong ha kaban ai mynsiem ia u bah Arden, hynrei ngi dei ban buh ka jingduwai na ka bynta jong u, uba la shah iap shah thnga na ka bynta ki khun jong ka ri bad ka jait bynriew.
Shuh shuh na ka liang jong u ma Firstbornson, u la pynrem ia ki nongmihkhmat kiba la jop na kane ka thaiñ ba kim leh ei ei kat kum ka jingkular jong ki ha ka por shwa ka Election, kiba la sngap jar khlem da iohi ba ki kren halor kane ka issue jong ka jait bynriew Khasi Pnar.
Shuh shuh la ong ruh ba kum kine ki jingialang pynshai paidbah halor ka Reservation Policy kin sa long shuh sha ki shnong bapher bapher ka thaiñ East Jaiñtia.