Ka jingiakhih da kaba shong kyllaiñ myngngor ha Khliehriat ba la khot da ka Jaintia Coordination Committee on Reservation Policy (JCCRP) jong ki sengbhalang na ri lum Jaiñtia, hynnin ka sngi ka la iaid beit ha kaba la wan ban ia shimbynta lang da ki paidbah, ki waheh shnong bad ki dkhot shnong na ki shnong bapher bapher.
U sam Sambormi Lyngdoh, uba dei u President jong ka East Jaintia National Council bad uba long ruh u General Secretary jong ka JCCRP, u la pynrem jur ia u wei u MLA na Garo u Dr. Miznur Rahamankazi, u la ong ba donkam 50% ka bhahkam ia ki unreserved, kiba kiwei ki jylla kiba na Garo Hills, kaei ka jingmut jong u, haba ngi mynta ngi dang iakhih ban nang pynheh ia kane ka bhah thungkam, kumno une pat u nud ban pan kum kane ka bhah.
U samla uba na ka shnong Umkiang, u bah Kynjaimon Amse haba kren ha ka jingialang u la pynpaw ba kane ka bhah thungkam ba mynta ka long kaba noh shiliang bad ong ba la dei ban pynthymmai noh bad dei ban buh beit solonsar 80 percent na ka bynta ki Khasi, Jaiñtia.
U Assistant Secretary JSM Central Body, u bah Kerbhame Dkhar, u la ther tyngeh ia ki nongmihkhmat bad ong ba “Lada kane ka jingiakhih jong ka JCCRP kam urlong ngin dang pynlong shuh shuh ia ki jingiakhih na ka bynta ka shuki jong ki MLA bad leh election biang da kawei namar dang lah ban jied da kiwei ki MLA ban ia kaba don kine ha Secreteriat, ki bym tip ban kren ia ki jingeh jong ka jaitbynriew.
U Waheh shnong jong ka Narwan, u bah Lamsuk Langstang, u la kren sngewkhia halor ka jingmih ki kynhun kiba pan bhah bad u la kyrpad ia baroh khamtam ia ki pnar-jaintia ba kin ieng shwa ha kawei ka lynti ban kyrshan shwa ia kane ka mat jingdawa jong u bah Ardent Basaiawmoit bad ruh ban buh ha ki jingdwai ban dup ioh ia ka jingangud.
Ha kane la sngi la thang ruh ia ki dur ne tyngshop utei u MLA na Garo halor ka jingkren khlem nongrim ka jong u.
