Ka HNYF – West Jaintia Zone mynta ka sngi ka la leit ban khang khyrdep ia ka ophis treikam jong ka Jio Degital Life kaba don ha shnong Nartiang na ka daw ba kam lah ban pynpoi ia ki tiar ki tar kiba la ai order ne ban pynphai ia ka pisa lyngba ka ophis jong ka.
Ia kane la lap hadien ba ka kong Anita Symblai kala order ia kawei ka Fridge bad ka Fan naduh ka 13 tarik u August mynta ka snem kiba shongdong Rs.21,630/-, hynrei haduh mynta la ar bnai kine ki tiar kim shym la poi shatia sha ka.
Katkum ka jingiathuh jong ki nongtrei kane ka Company ki ong ba ki tiar kim don stock shuh hynrei kin pynphai noh da ka pisa sha ki kong Anita. Hynrei haduh mynta la ar bnai ka ophis Jio kam lah ban pynphai ia katei ka pisa sha i kong Anita.
Kumta na ka liang ka HYNF- West Jaintia Zone hadien ba ka la ioh ia ka jingujor na ka kong Anita Symblai kala leit ban ia kynduh ia ki nongtrei katei ka company bad kila khang khyrdep noh shisyndon ia katei ka ophis kaba don ha shnong Nartiang. Ka seng lyngba u President jong ka u ma H.W. Sutong ula ong ba katba ka Company kam pat lah ban siew ia katei ka pisa jong ka kong Anita kim lah satia ban plie ia kane ka ophis treikam jong ki.