Ki Pulit jong ka East Jaiñtia Hills District mynta ka sngi hadien ba kila ioh jingtip ba don uwei u briew uba kyrteng u Abdul Aziz Barbhuiya uba la mih na Kalain ban leit sha Guwahati da kaba pyndonkam da ka kali (Maruti Swift) kaba don ia u Regn. No.AS-24-D-2838 uba la rah ia ki mar khaïi tuh, kumta ka kynhun ANTF jong ki Pulit ka Lumshnong PS kila pynlong ia ka jingpynap shrip ha ka shnong Tongseng ha u surokbah NH-06.
Ha kane ka jingpynap shrip ki Pulit kila ioh ban bat ia katei ka kali lem bad utei u Abdul Aziz Barbhuiya. Haba ki Pulit kila pynlong ia ka jingkhynra ia kane ka kali ha ka jingdonlang jong ki nongsakhi, ki la ioh ban kurup 74 tylli ki synduk buh sabon kiba don ia u kynja powder ba long stem-sohniamtra. Haba ki Pulit kila test ia une u powder ki lap ba u dei u Heroin bad u don ka jingkhia kaba 926.40 gms.
Katkum ka khubor Pulit la iathuh ba utei uba la shahkem u Abdul Aziz Barbhuiya ba 35 snem ka rta u dei na ka shnong Hailakandi, Assam. Na une u briew ki Pulit kila kurup ruh ia kawei ka mobile phone ryngkat bad kitei ki mar kujuh katei ka kali kaba u pyndonkam.
Ha kaba iadei bad kane ki Pulit kila register case pyrshah ia utei u bar jylla bad ka jingtohkit ia u ka dang iaid shakhmat.