Ka Jaiñtia Coordination Committee for Reservation Policy (JCCRP) kaba kynthup ia ki seng bhalang, Synjuk Waheh Chnong War Jaiñtia (SWCWJ), kiba kynthup ia ka Jaiñtia Student Union (JSU), Jaiñtia Youth Federation (JYF), Jaiñtia Student Movement (JSM), East Jaiñtia National Council (EJNC), mynta ka sngi 02.06.2023 kila bteng ia ka jingshong kyllaiñ myngngor sa ha jan Iew ka Amlarem Civil Sub-Division, na ka bynta ban dawa na ka sorkar ban pynbeit noh ia ka Reservation Policy jong ka jylla. Ia ka jingialang la pyniaid da u Waheh Shnong ka Amlarem u Kampher Pohlong.
Ha kaba la ioh ia ki jingkren na u Chairman JCCRP samla Jershom Shylla (President JSU), Secretary JCCRP samla Sambormi Lyngdoh (President EJNC), Heiboimi Myrphet na ka JSM, ma Kolmen Pohshna Adviser (SWCWJ), kong Deiwi Tongper (STIEH), Treibor Suchen (GS-JSU), Damonmi Dkhar Waheh Shnong Nartiang Modop bad kiwei de.
Kiba bun na ki nongkren kynthup ïa ki nongïalam sengbhalang, ki nongïalam shnong, ki riew paidbah bad ki riew rangbah kila kynthoh ia ka sorkar MDA-02 ba lam khmat da ka NPP mynta. Kila ban jur ba ka por kala dawa bha ïa ka sorkar ba kan pynbha noh ïa kane ka rukom thungkam thungjam hapoh ka jylla, khnang ban lait na kino kino ki jingeh khamtam ïa ki samla wad kam wad jam ha kine ki sngi ba mynta, kumba la ïohi kiba bun hi ki khun samla ynda kila dep ïa ki jingpule kiba hap ban shong khlem kam khlem jam”.
Shuh shuh kila ai ki jingiaroh ia u bah Ardent Miller Basaiawmoit u nongialam jong ka VPP uba la shah thngan haduh 9 sngi na ka bynta ban dawa ia kane ka kam ha kaba na ka liang ka sorkar ruh ka lashim khia bad ka la rai ban thaw ia ka Expert Committee ban peit ne bishar bniah noh ia ka Reservation Policy. Ha kaba na ka liang jong ki seng bhalang kila kyntu ia ka sorkar ban pyndep kloi ia kane jingbishar bad ban pynioh ia ka kaiphot kloi katba lah. Na ka liang jong ki ruh ki khmih lynti ba ka sorkar lyngba katei ka Expert Committee kan pynhun ia ka jingdawa jong ki paidbah Hynniewtrep.
Shuh shuh kila kyntu jur ïa baroh ki MLA ka RiLum Khasi-Jaiñtia ba kin mih sha khmat na ka bynta kane ka kam kaba donkam ia ka lawei jong ka jait bynriew.
