Ka 5 tarik u bnai Jylliew man la ka snem ka dei ka sngi ban kynmaw kyrpang ia ka Mei Mariang ha shityllup pyrthei ia kaba la tip kum ka World Environment Day.
Ha ka jingiadei bad kane ka sngi na ka liang ki bor pyniaid jong ka Seiñraij SSA Lower Primary School, Mukhap ki la pynlong ka jingrakhe kyrpang ia kane ka sngi da kaba pynlong ia ka jingthung dieng ha phyllaw jong ka skul. Kawei na ki prokram ba kham pher ba kane ka skul kala leh ka long ba ki khynnah skul kila leit ban bret ia ki Seedball ne ki symbai dieng kiba la shna kyrpang sha ki jaka lum ba long syllen ne bym don dieng kiba hap hapoh u pud u sam jong ka shnong Mukhap.
Ha kane ka sngi la iashim bynta lang da ka Dorbar Shnong Mukhap bad kiwei de ki skul ba kynthup ia ka David Edward UP School, Mukhap, ka Mukhap UPS-Secondary bad ka Lumlihoi UPS SSA bad ka jingiadon ryngkat u ma T. War District Soil and Water Conservation Officer (T) Division, Jowai, u ma Nujorki Sungoh, MLA kum u Kongsan.
Shwa ban sdang ia ka prokram thung dieng la don ka jingialang ba lyngkot ba la pyniaid da u ma S. Sungoh uba dei u Chairman Shnong Mukhap. Kiwei dei kiba la ai jingkhren ki kynthup ia u ma R. Lapasam, Waheh Shnong Mukhap, u ma S. Lamare, Chairman Watershed Committee Wahiongnoh Mynsar bad u ma T. War, DSWCO (T), Division, Jowai.
U Nujorki Sungoh haba ai jingkren u la kyntu ia baroh ki khun jong ka shnong Mukhap ba kin long ki briew kiba kheiñkor ia ka Mei Mariang, ula ong ba ka jingthung ia ki dieng ki siej ka iada ia ki tyllong um bad namarkata ka long ka kamram jong uwei pa kawei na ki nongshong shnong ba leh ia kane ka kam. U la ban jur ruh halor ka phang pdeng jong kane ka sngi mynta u snem kaba ong “Beat Plastic Pollution”.
Haba pynkut ia ka prokram la don ruh ka jingsam ia ki Prize sha ki nongjop ha ka jingiakop Drawing & Painting Competition.
