Ka shnong Nongtalang Mission kum ka dak ka jingrakhe ïa ka sngi pynneh pynsah ïa ka mei mariang kala pynlong ïaka program thung dieng mynta ka sngi ha kaba la mih ban ïashim bynta da baroh ki thliew ïing hapoh ka shnong ban thung mar 2 ne 3 tylli ki tynrai dieng hala ki jong ki phyllaw ïing bad ki kper ïing jong ki.
Ha kane ka sngi ka shnong kala pynlong shwa ïaka program ka ba rit kum ka jingplie pyrda ïaka campaign ka shnong ba la pynïaid da u Chairman shnong ma B.P. Sohsley. La ïoh ka jingkren lamkhmat na u Waheh Shnong ma S.T Rymbui uba la ïathuh ïa ka thong ba ka Dorbar Shnong ka don ban pynjyrngam biang bad pynpyngngad biang ïaka shnong lyngba ka jingthung ïaki dieng ha man ki thliew ïing ka ban ïarap ban tem ïaka jingnang kiew ka jingkhluit kat nang mih ki sngi. U la ong ba kane ka dei tang ka jingsdang bad yn dang bteng shuh shuh ïa kane ka campaign ha ki snem ki ban wan ruh.
Na ka liang u kongsan ha kane ka program u ma Kyrmen Roi Rymbui, Forester-1, Amlarem Range, Forest Department, ula pynkynmaw ïa ki sngi ba mynshwa ba ka shnong Nongtalang ka mad ïa ka jingpyngngad bad kumjuh ka dang ïoh ban dih ïaki um ba sngur hynrei ula kren bynñiaw ba kat nang mih ki sngi la nang pynsniew dur bad pynjot ïaka sawdong sawkun ka mei mariang tang na ka jingrhah spah jong u khun bynriew.
Shuh shuh ula pynkynmaw ba “U Blei haba u buh ïa ngi u khun bynriew hangne ha sla pyrthei um shym khang ba ngin pyndonkam ïa kiei kiei ba u la buh la thaw hynrei kam mut pat ba ngin shu pynjot pynjulor pathar khlem da tyngkai shuh ïaki para jingthaw jingpynlong kiba don la ka dor na ka bynta ka mynta bad ka lashai jong ngi hi”
Ula ban jur ruh ïa ka jingdonkam ban thung bujli ïa ki dieng ki siej ban pynjyrngam ïaki khlaw ba la syllen ka ban ïarap ban pynim ïaki tyllong um bam um dih, ban tyngkai ïaki jaka shong ki mrad ki mreng, ki sim ki doh, ban pynïoh ïa ka lyer khuid bad u slap ha la ka aiom ïa ki khun bynriew.
Hadien kane ka prokram u Secretary shnong Dr. R L Talang ula ïathuh ba kila pynbud pat da ka jingsam bad jingthung ïaki tyngrai dieng sha ki nongshong shnong ba la lam khmat da ki Self Help Group kiba don hapoh ka shnong.
