Shi bynta na ka jingrakhe ïa ka sngi pynneh pynsah mariang ne ka ‘World Environment Day’ kaba la sdang naduh ka snem 1973 ha manla ka 5 tarik u Jylliew bad kaba long ruh ka lad ban ai jinghikai ïa ki nongshong shnong ha kylleng ka Ri ka pyrthei halor ka jingshah ktah ka mei mariang naduh ka jingkiew palat ka jingshit ka suiñ bneng, ka jingpynjaboh bad ka jingpynïap pathar ïa ki mrad ki mreng, Kumta ban ïada ïa ka mei mariang bad ïa ki jingthaw kiba im kala dawa mynta ïa u khun bynriew ba un kyndit noh na kaba ïohthiah ban nym pynjulor shuh ïa ka mei mariang da ka ïaleh ban pynjyrngam biang ïa ka mariang kumba ka juh long ha kipor mynshwa.
Mynta ka sngi na ka liang kawei ka kynhun treimon sngewbha kaba la tip kum ka ‘Keep our Surrounding Clean Youth’ (KOSCY) SHG kala rakhe ïa kane ka sngi kyrpang ha ryngkat ka jingïatreilang bad North East Institute of Professional Studies (NEIPS) bad ka Jowai Municipal Board (JMB) lem bad ki nongtrei jong ka JMB ki member ka KOSCY, Team Nature Care SHG, ka Wailadmi SHG bad ka Yaityllilang SHG kila wan ïashim bynta ha kane ka sngi.
La ïathuh lyngba kane ka sngi na ka liang ka KOSCY SHG kala pynlong syndon da ka (Cleaning Drive) ban pynkhuid ïa ki jaboh naduh ki pla plastic, ki klong um, ki bilor bad kiwei de kaba la sdang naduh Tyrchi Fall haduh ki bynta ka Wah Myntdu.
Hashwa kane ka jingpynkhuid la don ka jingïalang ba lyngkot ha kaba la ïoh ka jingkren pdiang na u Samla Raj Passah, katba u President ka KOSCY SHG u bah Wenrickson Wahlang ula ai ka jingkren shaphang ka jingrakhe kyrpang ïa kane ka sngi ‘World Environment Day’, hadien kane la ïoh ka jingkren na u ma Pyndaplang Muksor uba la kren halor ka jingdonkam jong ka mariang na ka bynta u khun bynriew bad kaba donkam eh ka long ban sumar khuid ïa ka.
La ïoh ruh ka jingkren na u Waheh Shnongka Khliehtyrshi ma Kitbok Rymbai bad kaba khadduh la ïoh ka jingkren na u President ka TNC SHG ma Nishwa Pyrtuh ula ai ruh ai ki kyntien ai khublei ïa baroh kiba la don bynta lang ha kane ka sngi tad haduh ba kut jong ka prokram jingpynkhuid.
