U khleih duh ka District uba dei u Deputy Commissioner ka West Jaiñtia Hills District u bah B.S. Sohliya (IAS) uba long u kongsan ha ka jingrakhe kyrpang ïa ka sngi pynneh pynsah mariang ne ka ‘World Environment Day’ haka jingïalang ba la pynlong ha Samanlang Pastoral Centre Bishop’s House, Lumbihsyntu Mihmyntdu halor ka phang “Beat Plastic Pollution”, ula ong ba u don ka jingangnud ha ki snem ban wan ka jingrakhe ïa ka sngi pynneh pynsah mariang kan long kaba khampher, ym da kaba leh pyndep rukom hynrei manla uwei pa uwei u nongshong shnong u dei ban don ka jingkitkhlieh bad ka jingsngewthuh da kaba kylli halade kumno ban wanrah biang ka mei mariang kaba itynnad, khnang ban im ka lawei jong ka pateng bynriew.
Shuh shuh ula pynsngew ba ka jingpyndonkam ïa ki pla Plastic kam long kaba bha namar kine ki plastic ki lah ban ktah ïa ka mei mariang, ula pynkynmaw ha ki por mynshwa la juh pyndonkam da ka juh ka pla ban leit ïew, ban thied ïa ki mar ki mata, kumta u kyntu ba dei ban pyndonkam biang ïa kum kine ki pla (muna) haba leit ïew leit hat khnang ba ka jingdawa (demand) ïa ki pla plastic kan duh kan dam noh.
Ula ong ruh ka jingpyndon kam ïa ki pla plastic ka ktah bha ïa ka koit ka khia, da kaba kyntu ym dei ban ai sha ki khynnah khunlung ïa ki kynja pla Plastic namar ki shait dait ïa ki.
Ha kane ka sngi rakhe WED ki kynnah skul ha ryngkat ki nonghikai kila poi sha kane ka jingïalang ha ka jingiphuh iphieng ha ryngkat ka jingïashim bynta jong ki naduh ki jingrwai, ki jingshad tynrai nalor kiwei de bad la ïoh ruh ka jingbatai bniah na ki riew shemphang ba kynthup ïa ka Divisional Forest Officer, Jaiñtia Hills Office kong N. Laloo, MFS bad u Dr. H.H Mohrmen.
Na ka liang ka kong N. Laloo kala batia shaphang ki jingdonkam ban don ki khlaw ki btab kiba lah ba ai jaka sah ïa ki mrad ki mreng da kaba ïathuh ïa ka jingwan poi ki jait sim Pukni ha Lad Demthring. Na ka liang u Dr. H.H Mohrmen ula pyni ïa ka jingshah ktah ka mariang ha kine ki sngi ba jur ka jingpyndonkam ïa ki plastis bad ula batai kumno ban nang ban pyndonkam ïa ki ñiut ki nier.
Na ka liang ki bor District kila sam ruh ïa ki khusnam da ki (Certificate) sha ki tnad sorkar bapher bapher kumjuh sha ki kynhun treimon sngewbha bad ki shnong kiba don bynta ban ïada ïa ka mei mariang.
La ïadonlang ha kane ka sngi naduh u ADC bah F.B. Basan MCS, ma M.A. Challam MCS, bah W.K. Kharbuli (EAC), ïa ka jingïalang la pynïaid da u Silvester Phanbuh, MCS.
