Shi bynta ban ïasnoh bad ki ri ka pyrthei baroh ban rakhe ïa ka sngi kyrpang pynneh mariang ne ka ‘World Environment Day’, ka Khasi Students’ Union (KSU) Narpuh Circle hynnin ka sngi 5/6/2023 ka la pynlong da ka jingïakop thoh Slogan bad Drawing.
Ïa kane ka program la leh ha katei ka sngi ha Divine Word Secondary School Lumshnong. Ha kane ka jingïakop Slogan Writing bad Drawing Competition la wan shim bynta da ki 6 tylli ki School kiba don hapoh ka thaiñ Narpuh kata ka long, ka Umkiang Holy Cross Hr. Sec. School, Narpuh Modern Sec. School Umkiang, Christian Sec. School Lumshnong, Divine Word Sec. School Lumshnong, KJP Synod School Thangskai bad Chiehruphi Sec. School.
Ha katei ka jingïakop la jied 4 ngut ki khynnah na kawei ka School, 2 ngut kiba ïa shim bynta ha ka jingthoh Slogan bad 2 ngut pat ha ka Drawing.
Ka Theme jong katei ka jingïakop ka long “Ban Tyngkai ïa ka Meiri – Sawkun kaba long u Thied bah ka Jingim”
Ha shwa ban sdang ka jingïakop thoh bad drawing la don ka jingïalang kaba lyngkot ha kaba la ai jingkren da u Fr. Tonio Mathew uba dei u Principal ka Divine Word Secondary School Lumshnong bad kumjuh na u samla Phanuel Tongper uba dei u Environment Secretary ka KSU EJHDU.
La ïoh ruh ka jingthung dieng katto katne tynrai, katba ïa ka jingïalang la pynïaid da u bah KS Suchiang President KSU Narpuh Circle. Ïa ki nongjop yn ai da ki khusnam bad Certificate.
