U Deputy Commissioner ka East Jaiñtia Hills District, Khliehriat ha ka khubor ba u phah, u pyntip sha ki paidbah nongshong shnong ka East Jaiñtia Hills District ba ka Sorkar India ka la ai por ia ka Sorkar jylla ban pynbiang ryntih noh marmar ia ki Aadhaar jong ki khyllung khynnah kiba dei ki nongioh myntoi ia ka Skhim Supplementary Nutritional Program (Skhim ai bam ia ki khynnah) kaba la long ka jingkyrkhu ia ki khynnah rit kiba la ioh ia ki jingbam kiba tei ia ka met ka phad jong ki lyngba katei ka scheme hynrei ki ban hap duh noh ia kita ki jingmyntoi lada kim don ia ka Aadhaar Card.
Kumta, la iawer ia ki kmie ki kpa jong ki hep kiba rit bad ruh ia kiba la san ba kin shimkhia ban pynkhreh ia ki khun jong ki ban leit mih sha ki jaka ba la buh kyrpang na ka bynta ban shna ia ki Aadhaar Card bad lada ki khun jong ki lane ma ki kim don ia ka Birth Certificate, ki briew kiba la buh da ka sorkar kin sa iarap ban batai kumno ban leh, khnang ban pynsuk ia ki paidbah. Ki nongshna Aadhaar ba la pynbeit na ka Office jong u Deputy Commissioner kin sa wan sha ki shnong jong ki katkum ki program ba la shna kyrpang bad yn sa shna Aadhaar Card ia ki bad ki khun rit jong ki.
Shuh Shuh, lah ruh ban kdew hangne ba ka Sorkar India kan sa pynsangeh noh ia ka pisa jong kito ki nongbylla shispah sngi (Job Card Holder), Smart Card (MHIS) bad kiwei kiwei ruh ki skhim jong ka Sorkar India, lada kim don ia ka Aadhaar Card lane khlem register bad ka Aadhaar Card. Te kumta, la kyrpad ia baroh ki nongshong shnong jong ka District ba kin sngewbha ban shimkhia ia kane ka jingpyntip ba donkam khnang ba kan ym long ka jingduh jingmyntoi kaba khraw.