Ka Jaiñtia Students’ Movement- Eastern Region (JSM-ER) East Jaiñtia Hills District hapoh ka jingïalam u President samla Wellson Siangshai lem bad ki dkhot ki la leit bad ai da ka jingthoh sha ka Ophis ka Animal Husbandry and Veterinary, East Jaiñtia Hills District hadien ba ki nongri Masi ki la shah ktah ha ka jingpang Masi ba tip kum ka jingpang Lumpy Skin Disease kaba la saphriang bha hapoh ka District.
Ka jingwan jong katei ka jingpang masi kala don katto katne ki masi kiba la ïap noh na une u khniang jingpang kaba la wan rah ïa ka jingduhnong kaba khraw ïa ki Nongri Masi khamtam ïa ki longïing ba duk ba kyrduh kiba ju shaniah ban pyndap pynbiang ïa ki jingdonkam jong ka ïing ka sem tang na ka kam ri Masi.
La ïathuh ba ki shnong ha kaba ki Longïing ba ri Masi ba la shahktah ha kane ka jingpang dei ka Shnong Pamrakmai, Pamrapaithlu, Wapung Shnong, Sohkymphor, Byrwai Iongkaluh, Suchen, Iapmala, Byndihati, Lumshnong, Cham Cham bad kiwei kiwei ki Shnong hapoh ka District.
Halor kane ka seng ka la pynsngew ruh ba bun hi na ki longïing ki dei kiba wan na ka longïing ba duk te la dawa na kane ka Department/Sorkar ban ai noh da ka jingïarap/Compensation sha kito ki longïing ba shah ktah na ka jingïap ki Masi jong ki kum ka lad jingïarap bad ïoh jingïada na ka bor jong ka Sorkar.
Shuh shuh ka seng ka la dawa ïa kane ka Ophis ban buh noh da u Help-Line Number hapoh ka District khnang ban pynsuk ïa ki Nongri jingri kiba shah ktah ban pan jingïarap bad jingïada ba kyrkieh na kane ka ophis.
Ka seng ha ka jingïakynduh ïa ka Senior Animal Husbandry & Veterinary Officer, East Jaiñtia Hills District, Khliehriat kala pynsngew ba na ka liang ka Department ka la shimkhia halor kane ka jingpang Masi ba tip kum ka Lumpy Skin Disease bad ki Nongtrei jong kane ka tnat ki la leit ai vaccination, injection bad Awareness Program sha ki Nongri Masi jong ki Shnong bapher bapher hapoh ka District.
Ha ka jingïakren bad ka seng katei ka officer kala pynsngew shibun ki jingeh ha kane ka office treikam ha ka jingbym pynbiang ka Sorkar ia ki jingdonkam naduh ki fund, ki Dawai dashin bad kiwei kiwei, teng teng ki hap sei na pla lade tang ban ïoh thied ïa ki dawai dashin ban ïarap ïa ki Nongri jingri ba shah ktah.
Ka Seng ka la ai jingmut ruh khnang ban don ka jingïatreilang bad ki bor Shnong ka ophis ka dei ban khot jingïalang ïa baroh ki Rangbah Shnong ne Secretary Shnong halor kane ka jingpang khnang ban lah ban pynsngew thuh bad tehlakam ïa ka jingpur sted jong une u jingpang.
Ha ka juh ka por ka Seng ha ka jingkynduh bad ka officer kala pynsngew ba ïa u ne u khniang jingpang ba saphriang hapoh ka District lah ban dei na ka jingwan shalan ïa ki Masi ba na bar Jylla shapoh ka Jylla Meghalaya.