Ki 52 ngut ki samla kiba la dep ban shah hikai hapoh ka Greta Solutions Training Academy (GSTA) ha ka kam shet jingshet “Street Foot Vendor-Standalone” mynta ka sngi Thohdieng kine ki samla kila shah pynkup burom bad sam tiar (start-up tools) ban kin sdang noh ban seng ïa ka kam da kaba ïeng hala ki kjat la jong.
Ïa kane ka prokram la pynlong mynta ka sngi ha Kiang Nangbah Govt’s College Auditorium ha ryngkat ka jingïadong lang u kongsan uba dei u MLA ka thaiñ ma Wailadmiki Shylla, ka kong D. Lyngdoh (ADC), u Skill Development Officer WJHD ma Lambormi Suchen, ka Principal jong ka College Dr. (Mrs) E.M. Blah, ki nonghikai (Lecturer) bad ki kmie ki kpa jong kitei ki samla.
ïa kitei ki tiar (start-up tools) la pynïoh lyngba ka project SKILLS MEGHALAYA hapoh ka jingpeit jong ka Meghalaya State Skill Development Society (MSSDS) kiba kynthup ïa ki tyngdong shet jingshet ne ki (Portable Single Burner Gas Stove), ki kharai, ki pliang bad kiwei de.
Na ka liang kitei samla kiba la dep ban shah pyntbit ha kane ka kam ha ka jingkren kila pynpaw ka jingai khublei kyrpang ïa ka Greta Solutions Training Academy (GSTA) kaba la ïarap ban ai ka jinghikai ba janai ïa ki ha ka liang jong kane ka kam, ym tang kata kila ïoh jinghikai ruh halor kumno ban kren bad ka jingpynïadei bad ki nongthied nongpet.
Shuh shuh kila pynsngew hadien ba ki la dep shah hikai kala long ka jingmyntoi kaba khraw eh ïa ki bad kane ka la plie ka lad ka lynti ïa ki ban trei ha ki dukan (Restaurant) kiba don kum ha nongbah Shillong bad kymjuh ha sor Jowai bad ki don ruh napdeng jong ki kaba la lah ban seng la ki kam la jong.
U ma Wailadmiki Shylla ha ka jingkren ula pynpaw ka jingsngewkmen ba ïadon bynta ha kum kine ki prokram seng kam seng jam na ka bynta ki khun samla, ula kyntu ïa ki samla kiba la dep ban shah hikai ba kin long kiba minot thop ha ka kam khnang ba ka kam jong ki kan dang kiew shuh shuh katba dang mih ki sngi.
“Haoid ka pyrthei mynta kala don ha ka jingkyrduh kam kyrduh jam khamtam ha ki kam sorkar, hynrei ki don pat ki lad ki lynti kum kine ki jait kam kiba lah ban seng da lade bad kiba don kynrei hapoh ka jylla jong ngi” ong ma Wailad.
Ula pynsngew ruh ïa ki jingeh ba ki khun samla mynta ki ïakynduh haba wad ïa ki kam sorkar da kaba ong haba ka sorkar ka khot kino kino ki Advertisement, kiba apply ïa ka kam kila kynjoh da ki phew hajar ngut, kumta na ka liang ka sorkar ruh kam lah shuh ban pynioh kam sorkar ia baroh.
Halor kane ka jingeh ula ong ba ka sorkar kala pyrshang ban wad ki lad ki lynti na ka bynta ki khun samla ba kin ïeng noh hala ki jong ki kjat lyngba ka Meghalaya State Skills Development Society kaba lah ban ïarap ïa ki samla ban seng ïa ki kam ki jam la jong.
Ha kane ka sngi la sam ruh ïa ki syrnod na ka bynta ki 52 ngut ki samla jong ka pali (Batch) 3rd bad 4th kiba la pyndep ïa kane ka jinshah hikai ha ka Greta Solutions Training Academy (GSTA), ïa ka jingïalang la pynïaid da u ma Sonjoy Shylla, Centre Head, Jowai, katba ïa ki kyntien ai khublei la ïoh na ka Evie Cordia Lamare.
