Ka East Jaiñtia Mid-Day Meals Workers Unit, ha kane ka sngi Thodieng kala pynlong ia ka jingialangbah ha West Khliehriat Community Hall, ha ka jingdonlang ki nongkitkam jong ka Central Body ka All Jaiñtia Mid-Day Meals Workers Union. La sdang ia ka jingialang da ka jingduwai, katba iaka jingialang la pyniaid da ka kong Pdiangmon Chyrmang kaba long ruh ka President ka EJMDMWU.
La ioh ia ka jingkren pdiangburom na ka kong Shim-ika Sungoh members EJMDMWU, ka jingkren halor ka jingeh jong ki nongshet ja haki skul ha kane ka District da ka kong Leki Bareh member East Jaiñtia, hadien la ia shim bynta ruh da kiba bun ba lang ban pynsngew ia ki jingeh bapher bapher kiba ki iakynduh. Na ka liang kine ki nongshet ja sngi ki la pynpaw ruh ka jingiaroh ia ki nongkitkam ka All Jaiñtia Mid-Day Meals Workers Union, kiba la trei shitom na ka bynta ban pynsie ia ki jingdonkam jong ka Union.
Hadien kane la ioh ia ki jingkren bad jingpynshai da u Adviser ka Union u ma Khroo Lamsalanki Pariat ia ki jingkylli kiba la aid a kiba bun baling ha kane jingialang. Ha kaba u ma Khroo u la iathuh ba ia ka jingsiew ne ka honorarium jong ki Cook, ka sorkar kala pynkiew naduh u bnai April, 2022 sha ka 2 hajar tyngka, katba ia ka pisa kaba dang sah sha ka sorkar kan pyllait ha kine ki sngi ban sawan, ha ka juh ka por u ma Khroo u la pynshlur bad ban jur ia ki nongshet baroh ba ki dei ban long kiba trei shitom ne tista ha ka kam jong ki, kumjuh ruh ban long kiba leh khuid bad kiba iatreilang ryngkat ryngkat bad ki Nonghikai khnang ba kane ka Scheme kan nangiaid beit shuh shuh hapoh kane ka jylla.
Ha kane ka sngi la ioh ruh ki jngpynshai halor ki kam kiba ka All Jaiñtia Mid-Day Meals Workers Union, kala iaid lynti na u President ka Seng u samla Jerry Anderson Suting, ba hapdeng ka jingiaid lynti ka seng kala ioh ban kheit ia katto katne tylli ki soh ka jingjop, kumta u buh ka jingkyrpad ia ki nongshet ja sngi kiba don ha kane ka thaiñ East Jaiñtia Hills Districts ban long kiba iatreilang, khnang ba ka sorkar kan jubab ia ki jingdawa jong ki kum ki Nongshet ja sngi ha ki skul.
Kumba long mynta ki jingdawa ba ha khmat eh jong ka seng ki long ka LPG, ka Maternity leave, Drinking water, khamtam ka Central Share na ka bynta ban kyntiew (Enhance) ia ka honorarium iong ki Cook na ka Government of India khnang ba ki Cook kin kham ioh ban pyndap pynbiang ia ki jingdonkam ka iing ka sem ka jong ki.
La pynkut ia ka jingialang da ki kyntien khublei bad kyrkhu kyrdoh lyngba ka seng EJMDMWU.