Mynta ka sngi ka Meghalaya People United Front (MPUF) Lad Rymbai Unit, East Jaintia Hills District ka la ioh ban ai jingiarap sha ki 23 tylli ki longïing bad kumjuh ruh sha ki ar ngut ki khynnah kiba don ka jingduna dkhot met ha ka shnong Khliehdupon Lad Rymbai.
Ia kane ka prokram ai jingiarap la ialam da u President bah E. Ryndem bad General Secretary bah Bonifast Ryndem ha ka jingiadon lang u President EJHD bah K. Blah bad kiwei ki nongialam bad dkhot.
Haba kren ha ka jingialang u bah Bonifast ula pynpaw ba ka seng da ka jingisynei ia kine ki longing bad ruh ia kine ki khynnah ba don jingduna kumta da ka mynsiem iatreilang kila synniang para dkhot kat kaba ki ioh ei bad kila pynmih ia ka pisa na ka bynta ban ioh synniang sha kine ki 23 tylli ki longïing bad 2 ngut kitei ki khynnah ba don jingduna.
U President ka EJHD bah Kyrshan Blah haba kren ula pynpaw ka jingkmen kaba khraw haba u iohi ba kum ka Unit jong ka seng ruh ka la lah ban leh ia ki kam ba bha ne kam jingrap naka bynta kito kiba donkam shisha ia ka jingiarap, na ka liang jong u la kitbok kit rwiang, bad kyntu ruh ia ki nongialam bad ki dkhot jong kane ka Unit, ba kin nangtrei ia ki kam ba bha. U la ong ba kim dei ban sngap ia ka jingkynnoh ki briew, namar kum ki nongialam seng ki don shibun ki jingeh bad ki dieng pynkiang, hynrei ym dei ban sngap ne shepting ia kine ki jingeh da kaba iaid shakhmat ia ki kam ba bha bad kiar na ki kam ba sniew bad pynthoh bria ia ka seng bad ia lade hi shimet.
La ioh ruh ka jingkren na kawei na ki longkmie kaba la ioh ia ka jingiarap ha kane ka sngi kaba la ai ki kyntien kitbok kit rwiang ia ki nongialam ka seng ba kin ioh ia ka met ka phad ba koit bakhiah da ka jingkynkhu kyrdoh u trai kynrad na jrong khnang ba kin nanglah ban ai ki jingiarap ia ki duk ba rangli.
