U Deputy Commissioner jong ka East Jaiñtia Hills District u A. Baranwal, IAS, ula bthah ia baroh ki nongleit nongwan kiba dei iaid ia u surok bah NH-6 ha ki thaiñ Narpuh kata naduh Lumshnong haduh Malidor ba ki dei ban rah lang bad ki jingbam kumjuh ka um dih, khnang ba kin ioh ban pyndomkam ialade lada jia ba ki iakynduh ia ka jingsahkut kali ha kine ki sngi na ka daw jong ka jingtwa jong ka khyndew ha ki bynta jong ka shnong Sonapurdi ba don ka Tunnel.
Ka jinghap jong u slap ha kine ki khyndiat sngi kala pynlong ia ka khyndew ban twa ha shi lynter jong u surok bah NH-6. Kum kane ka jingtwa khyndew ka la jia ruh ha Sonapurdi ha kaja ba ju jia ka jingtwa khyndew man la ka snem haba poi ka aiom slap (Monsoon).
Kumta u DC u la bthah ruh ia ki nongleit nongwan ba lymda dei ba ki donkam eh, ka bha ba kin sangeh shwa ka leit ka wan hapoh kine ki por ba jur slap, namar ym lah ban tip ha kano ka por ba ka khyndew ne ki lum ki lah ban twa ne khyllem bad ban ia ki bynta jong u Surok bah, la pyntip shuh shuh u Baranwal.