Ha ka jingleit donkam jong ka seng Hynñiewtrep Achik National Movement (HANM) hapoh ka jingialam u President HANM Jaiñtia Zone bah Shaniahlang Suchen bad u General Secretary HANM Jaiñtia Zone sha ka ophis treikam jong u Executive Engineer, Central Division Jowai ha ka por 12:30 shiteng sngi kila lap pynban ba ki nongtrei jong katei ka ophis kim pat poi shala jingtrei wad haduh shiteng sngi ruh, kane kala pynlyngngoh ia ka seng ban iohi ia kane.
Na ka liang ka HANM ka dawa na ka sorkar ban behkam ne suspend noh shisyndon ia kito ki nongtrei jong kino kino ki ophis sorkar ki bym lah ban wan biang por, namar kane kan ktah ia ki paitbah ba bun ba lang kiba wan donkam khamtam kiba wan na ki thaiñ nongkyndong. Ka seng ka pynpaw ba kane ka rukom leh jong ki nongtrei ka PWD Central Division ka long la kum ka ophis la jong kaba ki lah ban leh katba ki mon.
Kumta ka seng ka kyntu ia ki nongtrei kane ka ophis ba ki dei ban kynmaw ba ki dei ki nongtrei jong u paitbah, ka ophis ruh dei ka ophis jong u paitbah lada kim lah ban wan trei biang por ka bha ban iehkam noh.
Na ka liang ka seng ka dawa na ka sorkar ba kam dei ban ai lad ia ki nongtrei sorkar ban wan sha office katba ki mon bad ka dei ruh ban shim khia bad hukum ia ki nongtrei sorkar ban wan biang por sha office khnang ba ki paitbah kin suk ban pyndep ia ki kam jong ki bad ia ki bym treh ban wan biang por dei ban pynshitom tyngeh ia ki khnang ban iaid beit iaid ryntih ka rukom trei kam baroh ha ki office sorkar.
Ia kane ka khyrwoh la phah da u Publicity Secretary ka seng HANM WJHD u Arki Lytan.